சிலம்பம் போட்டியில் பதக்கம் வென்றவர்களுக்கு பாராட்டு!

வேர்ல்டு யூனியன் சிலம்பம் பெடரேஷன் சார்பில் சர்வதேச அளவிலான முதலாவது ஆசிய சாம்பியன்ஷிப் சிலம்பம் போட்டி விஜயவாடாவில் 3 நாட்கள் நடந்தது. இதில் இந்தியா, இலங்கை, சிங்கப்பூர், கனடா உள்ளிட்ட 8 நாடுகளைச் சேர்ந்த மாணவ- மாணவிகள் பங்கேற்றனர்.

வேலூர் டோல்கேட் சின்னஅல்லாபுரம் பகுதியில் உள்ள எம்-ஸ்டார் சிலம்பம் பயிற்சி பள்ளியை சேர்ந்த 16 மாணவ- மாணவிகளும் கலந்து கொண்டு 11 தங்கப்பதக்கம், 9 வெள்ளிப்பதக்கம், 2 வெண்கல பதக்கம் பெற்று தமிழகத்தில் முதல் அணியாக வெற்றி பெற்றனர். இவர்களுக்கு பயிற்சியாளர் மணிகண்டன் பாராட்டு தெரிவித்தார்.

பதக்கங்கள் பெற்ற மாணவ-மாணவிகள் ரயில் மூலம் காட்பாடி ரயில் நிலையத்திற்கு வருகை தந்தனர். அப்போது மாணவர்களுக்கு பல்வேறு விளையாட்டு வீரர்களும், பொதுமக்களும், சிலம்ப பயிற்சியாளர்களும் மலர்களை தூவியும், மாலை அணிவித்தும், பொன்னாடை போர்த்தியும் வரவேற்றனர். இதில் கார்த்திகேயன் என்ற மாணவனின் பாட்டி, தனது பேரன் சிலம்பம் போட்டியில் தங்கம் வென்றதால் அவனுக்கு ரெயில் நிலையத்திலேயே தங்க மோதிரம் அணிவித்து, கன்னத்தில் முத்தம் கொடுத்து மகிழ்ச்சியை வெளிப்படுத்தினார்.