சிவகிரியில் கடையில் டிவி, பணம் திருடிய நபர் கைது

தென்காசி மாவட்டம் சிவகிரி சித்திவிநாயகர் கோவில் தெருவைச் சேர்ந்தவர் வீரபுத்திரன் மகன் முத்து (வயது 27). இவர் மேலரத வீதியில் பர்னிச்சர் கடை நடத்தி வருகிறார். கடந்த மூன்று நாட்களுக்கு முன்பு இரவு முத்து கடையை அடைத்து விட்டு வீட்டிற்குச் சென்று விட்டார். அன்று நள்ளிரவு நேரத்தில் யாரோ கடையின் பூட்டை உடைத்து உள்ளே சென்று அங்கிருந்த இரண்டு எல்இடி டிவி மற்றும் ரூ. 24, 800ம் ரொக்க பணம் ஆகியவற்றை திருடிச் சென்று விட்டனர். இதுகுறித்து முத்து சிவகிரி காவல் நிலையத்தில் புகார் செய்தார். போலீசார் வழக்கு பதிவு செய்து தீவிர விசாரணை செய்தனர். விசாரணையில் கடை பூட்டை உடைத்து உள்ளே சென்று டிவி, பணத்தை திருடிச் சென்றது சிவகிரி சிவராம லிங்கபுரம் வடக்கு தெருவைச் சேர்ந்த சுப்பிரமணியன் மகன் மணிகண்டன் (வயது 29) என தெரிவந்தது. இதனை அடுத்து இன்று மணிகண்டனை போலீசார் கைது செய்து சிவகிரி குற்றவியல் நீதித்துறை நடுவர் மன்றத்தில் ஆஜர்படுத்தி சிறையில் அடைத்தனர்.