நாமக்கல் : ஜூன் 9ம் தேதி குரூப் 4 தேர்வு 51,433 தேர்வர்கள் பங்கேற்பு!

தமிழ்நாடு அரசு பணியாளர் தேர்வாணையம் (டிஎன்பிஎஸ்சி) குரூப்-4 தேர்வுக்கான அறிவிப்பை, கடந்த ஜனவரி 30ம் தேதி வெளியிட்டது. அதன்படி டைப்பிஸ்ட், சுருக்கெழுத்தர், வி.ஏ.ஓ., வரி தண்டலர், பண்டக காப்பாளர் உள்ளிட்ட 6,244 பணியிடங்களுக்கு போட்டித் தேர்வு வருகிற 9ம் தேதி தமிழ்நாடு முழுவதும் நடைபெற உள்ளது. இந்த பணிகளுக்கு வெப்சைட் மூலம் ஆன்லைனில், 20 லட்சத்துக்கும் மேற்பட்டோர் விண்ணப்பித்து உள்ளனர். கடந்த 27ம் தேதி முதல், தேர்வர்களுக்கு வெப்சைட் மூலம் ஹால் டிக்கட் அனுப்பி வைக்கப்பட்டது.

நாமக்கல் மாவட்டத்தில், குரூப் 4 தேர்வு, 174 மையங்களில் நடக்கிறது. இந்த தேர்விற்காக 51,433 பேர் விண்ணப்பம் செய்துள்ளனர். நாமக்கல் தாலுகாவில் 39 தேர்வு மையங்களில் 12,073 பேர், மோகனூர் தாலுகாவில், 8 மையங்களில் 2,229 பேர், சேந்தமங்கலம் தாலுகாவில் 17 மையங்களில் 4,562 பேர், ராசிபுரம் தாலுகாவில் 44 மையங்களில் 13,355 தேர்வர்கள் எழுதுகின்றனர். மேலும், பரமத்தி வேலூர் தாலுகாவில் 21 மையங்களில் 5,872 பேர், திருச்செங்கோடு தாலுகாவில் 35 மையங்களில் 10,405 பேர், குமாரபாளையம் தாலுகாவில் 10 மையங்களில் 2,937 பேர், என மொத்தம் மாவட்டம் முழுவதும் 51,433 தேர்வர்கள் தேர்வில் கலந்துகொண்டு தேர்வு எழுதுகின்றனர்.