புதுமணஜோடி படுகொலை வழக்கு: நான்குபேர் கைது

தூத்துக்குடி முருகேசன் நகர் பகுதியை சேர்ந்த மாரி செல்வம் என்ற இளைஞரும் திரு வி க நகர் பகுதியைச் சேர்ந்த கார்த்திகா என்ற இளம்பெண் கடந்த மூன்று வருடங்களாக காதலித்து வந்துள்ளனர்‌. இந்நிலையில் மாரி செல்வம் தனது பெற்றோர் வசந்தகுமார் உள்ளிட்டோருடன் கடந்த ஆறு மாதங்களுக்கு முன்பு கார்த்திகாவை திருமணம் செய்து வைக்கும்படி கார்த்திகாவின் வீட்டில் பெண் கேட்டுள்ளனர்.

ஆனால் இதற்கு கார்த்திகாவின் தந்தை முத்துராமலிங்கம் உள்ளிட்ட குடும்பத்தினர் எதிர்ப்பு தெரிவித்துள்ளனர். இதை தொடர்ந்து ஆறு மாதங்கள் கழித்து திருமணம் செய்து வைக்கிறோம் என்று கூறி அனுப்பி உள்ளனர். ஆனால் தொடர்ந்து கார்த்திகா மாரிச்செல்வம் காதலுக்கு பெண் வீட்டார் எதிர்ப்பு தெரிவித்து வந்த நிலையில் கடந்த 30ஆம் தேதி தேவர் ஜெயந்தி அன்று மாரி செல்வம் மற்றும் கார்த்திகா ஆகியோர் வீட்டை விட்டு வெளியேறி கோவில்பட்டியில் வைத்து திருமணம் செய்து கொண்டுள்ளனர்.

இதைத் தொடர்ந்து இரண்டு நாள் கழித்து மாரி செல்வத்தின் வீடான முருகேசன் நகருக்கு வந்துள்ளனர் இதைத்தொடர்ந்து புதுமண தம்பதிகளான மாரி செல்வம் மற்றும் கார்த்திகா கடந்த ஒன்றாம் தேதி புது தம்பதியர்கள் தி ரு வி க நகரில் உள்ள கார்த்திகாவின் தாய் மாமா வீட்டிற்கு விருந்துக்கு சென்று திரும்பி உள்ளனர்.

இந்நிலையில் தங்கள் எதிர்ப்பை மீறி தங்களது மகள் கார்த்திகா தங்களை அசிங்கப்படுத்தி திருமணம் செய்து கொண்டதால் ஆத்திரத்தில் இருந்த கார்த்திகாவின் தந்தை முத்துராமலிங்கம் தூண்டுதலின் பேரில் நேற்று மாலை முருகேசன் நகர் வீட்டில் மாரி செல்வம் மற்றும் கார்த்திகா தனியாக இருக்கும்போது மூன்று இருசக்கர வாகனத்தில் வந்த ஆறு பேர் கொண்ட கும்பல் பயங்கர ஆயுதங்களால் புதுமண தம்பதிகள் இருவரையும் வெட்டி சாய்த்து விட்டு தப்பி ஓடினர்.

இதைத் தொடர்ந்து சம்பவ இடத்திற்கு மாவட்ட காவல் கண்காணிப்பாளர் பாலாஜி சரவணன் தலைமையிலான காவல்துறையினர் வந்து விசாரணை நடத்தினர்‌ குற்றவாளிகளை கைது செய்ய மூன்று தனிப்படைகள் அமைக்கப்பட்டன. இதில் இன்று காலை கொலைக்கு தூண்டுதலாக இருந்த கார்த்திகாவின் தந்தை முத்துராமலிங்கம் முதலில் கைது செய்யப்பட்ட நிலையில் தற்போது இந்த கொலை சம்பவம் தொடர்பாக இசக்கி ராஜா, ராஜபாண்டி, மற்றும் 16 வயதான இளம் சிறார் ஆகிய நான்கு பேரை கைது செய்துள்ளனர். மேலும் இந்த கொலையில் தொடர்புடைய சில குற்றவாளிகளை தனிப்படை போலீசார் தேடி வருகின்றனர்.