மோட்டார் சைக்கிள் மீது கார் மோதிய விபத்தில் ஒருவர் உயிரிழப்பு

சேலம் மாவட்டம் வேம்படிதாளம் பெருமாள் கோவில் தெருவை சேர்ந்தவர் மோகன்ராஜ் (வயது 37). இவர் சேலத்தில் தனியார் வங்கி ஒன்றில் மேலாளராக பணியாற்றி வந்தார். இவரது நண்பர் சந்துரு (28). இவர்கள் இருவரும் சேலம் 5 ரோட்டில் இருந்து கொண்டலாம்பட்டி பட்டர்பிளே பாலத்தின் வழியாக மோட்டார் சைக்கிளில் சென்றனர். அப்போது கோவையில் இருந்து சேலம் நோக்கி வந்த கார் மோட்டார் சைக்கிள் மீது மோதியது. இந்த விபத்தில் மோகன்ராஜ், சந்துரு ஆகிய 2 பேரும் பாலத்தில் இருந்து தூக்கி கீழே வீசப்பட்டு படுகாயம் அடைந்தனர். இதையடுத்து அக்கம் பக்கத்தினர் அவர்கள் 2 பேரையும் மீட்டு சேலம் அரசு மருத்துவமனைககு அனுப்பி வைத்தனர். அங்கு டாக்டர்கள் பரிசோதித்த போது மோகன்ராஜ் ஏற்கனவே இறந்துவிட்டது தெரியவந்தது. படுகாயம் அடைந்த சந்துருவுக்கு தீவிர சிகிச்சை அளிக்கப்படுகிறது. இந்த விபத்து குறித்து கொண்டலாம்பட்டி போலீசார் வழக்குப்பதிவு செய்து விசாரணை நடத்தி வருகின்றனர்.