மாணவரிடம் அத்துமீறல் ஆசிரியருக்கு 'போக்சோ'

காஞ்சிபுரம் அருகே, பள்ளி மாணவருக்கு பாலியல் தொல்லை கொடுத்ததாக, இயற்பியல் ஆசிரியர், 'போக்சோ'வில் போலீசாரால் நேற்று கைது செய்யப்பட்டார். காஞ்சிபுரம் அருகேயுள்ள செவிலிமேடு பகுதியில் உள்ள பிரபல தனியார் மெட்ரிக் மேல்நிலைப் பள்ளியில், கலெக்டர் அலுவலகம் அருகே வசிக்கும், 16 வயது மாணவன் படித்து வருகிறார். இவருக்கு, அதே பள்ளியில் இயற்பியல் ஆசிரியராக பணியாற்றும் காமேஷ், 42, என்பவர் பாலியல் தொல்லை கொடுத்ததாக கூறப்படுகிறது.

மேலும், மாணவருக்கு மொபைல் போன் மூலம் பாலியல் ரீதியான குறுஞ்செய்திகளை அனுப்பியதாக, மாணவர் தன் பெற்றோரிடம் தெரிவித்துள்ளார். இதையடுத்து, மாணவரின் தாயார், காஞ்சி தாலுகா போலீசில் புகார் அளித்தார். அதைத் தொடர்ந்து, 'போக்சோ' சட்டத்தில், இயற்பியல் ஆசிரியர் காமேஷ், போலீசாரால் நேற்று கைது செய்யப்பட்டார்.