மாவட்ட ஆட்சியரால் மீட்கப்பட்டவர் பூரண குணம் - நெகிழ்ச்சியுடன் நன்றி

நாமக்கல் மாவட்ட ஆட்சியர் உமா, கடந்த மே 17ம் தேதி, ராசிபுரம் பகுதியில் ஆய்வுப் பணிகளை மேற்கொள்வதற்காக காரில் சென்றார். காலை 10 மணியளவில், நாமக்கல் - சேலம் மெயின் ரோட்டில் பொம்மைகுட்டைமேடுலட்சுமி திருமண மண்டபம் அருகே அவர் சென்றபோது, அவ்வழியாக டூ வீலரில் சென்ற நாமக்கல் மாவட்டம், செல்லப்பம்பட்டி, மேற்கு பாலப்பட்டியை சதீஷ் (38), என்பவர் சாலை விபத்தில் காயமடைந்து கீழே விழுந்து கிடந்தார்.

அதைக்கண்ட ஆட்சியர் உமா, தனது காரை நிறுத்தி, காயம்பட்ட சதீஷை மீட்டு, ஆம்புலன்ஸ்க்காக காத்திராமல், தன்னுடன் வந்த மற்றொரு அரசு வாகனத்தில் ஏற்றி, சிகிச்சைக்காக நாமக்கல் அரசு மருத்துவக்கல்லூரி ஆஸ்பத்திரிக்கு அனுப்பி வைத்தார். மாவட்ட ஆட்சியர் அறிவுறுத்தலின்படி அவருக்கு அங்கு உயர் சிகிச்சை அளிக்கப்பட்டது. அவருக்கு தலை மற்றும் கால்களில் பலத்த காயம் ஏற்பட்டிருந்ததால், அவர் மேல் சிகிச்சைக்காக கோயம்புத்தூர் தனியார் ஆஸ்பத்திரியில் அனுமதிக்கப்பட்டு, 15 நாட்கள் தொடர் சிகிச்சை அளிக்கப்பட்டு தற்போது பூரண குணமடைந்துள்ளார். இதனைத்தொடர்ந்து, நாமக்கல் ஆட்சியர் அலுவலகத்திற்கு வருகைதந்த சதீஷ், ஆட்சியரை நேரில் சந்தித்து, தனக்கு தக்க நேரத்தில் உதவி செய்து, உயிரைக் காப்பாற்றியதற்காக நன்றியை தெரிவித்துக்கொண்டார்.

இது குறித்து சதீஷ் தெரிவித்ததாவது.... மாவட்ட ஆட்சியர் உரிய நேரத்தில் உடனடியாக மீட்டு முதலுதவி சிகிச்சை அளிக்கப்பட்டதன் காரணமாக என்னால் பூரண நலம் பெற முடிந்தது. விபத்து ஏற்பட்ட உடன் குறுகிய காலத்தில் மருத்துவமனைக்கு அனுப்பி வைக்கப்பட்டதனால் இன்று நான் உயிர் பிழைத்தற்கு முக்கிய காரணம் ஆகும். எனவே, மாவட்ட ஆட்சியர் செயல் மிகவும் நன்றிக்கு உரியதாகும். எதிர்காலத்தில் எதிர்பாராத விதமாக சாலை விபத்து ஏற்படும் சமயத்தில் நான் விபத்திற்கு உள்ளானவரை மீட்டு மருத்துவமனைக்கு அனுப்பி வைக்க கண்டிப்பாக தேவையான உதவிகள் / முதலுதவிகள் மேற்கொள்வேன்.

மேலும், விபத்துகளை தடுப்பது குறித்து என்னால் இயன்ற விழிப்புணர்வு பணிகளை கட்டாயம் மேற்கொள்வேன். விபத்தில் இருந்து என்னை உடனடியாக மீட்டு மருத்துவமனைக்கு அனுப்பி வைத்த மாவட்ட ஆட்சியர்,பிற அலுவலர்கள் மற்றும் பணியாளர்களுக்கும் மீண்டும் ஒரு முறை எனது நன்றியினை தெரிவித்துக்கொள்கிறேன்.மேலும், பொதுமக்கள் சாலை விதிகளை முறையாக கடைப்பிடித்து விபத்துக்கள் ஏற்பாடாத வகையில் வாகனங்களை பாதுகாப்பாக இயக்க வேண்டுமென கேட்டுக்கொள்கிறேன் என தெரிவித்தார். விபத்தில் காயமடைந்த சதீஷ் சொட்டு நீர் பாசனம் அமைக்கும் பணிகளை மேற்கொண்டு வருகிறார் என்பது குறிப்பிடதக்கது. இந்நிகழ்வில் மாவட்ட வருவாய் அலுவலர் மருத்துவர் ரெ.சுமன், நாமக்கல் வருவாய் கோட்டாட்சியர் ஆர்.பார்த்தீபன் உட்பட துறைசார்ந்த அலுவலர்கள் உடன் இருந்தனர்.