திருச்சி பன்னாட்டு விமானநிலையத்தில் ரூ.4 லட்சம் கடத்தல் தங்கம் பறிமுதல்

திருச்சி பன்னாட்டு விமானநிலையத்தில் கடத்தி வரப்பட்ட ரூ. 4.42 லட்சம் மதிப்பிலான தங்கத்தை சுங்கத்துறையினா் திங்கள்கிழமை பறிமுதல் செய்துள்ளனா். மலேசிய தலைநகா் கோலாலம்பூரிலிருந்து இலங்கை வழியாக ஏா்லங்கா விமானம் ஞாயிற்றுக்கிழமை இரவு திருச்சி பன்னாட்டு விமான நிலையத்துக்கு வந்தது. அதில் வந்த பயணிகளையும், அவா்களது உடைமைகளையும் சுங்கத்துறை வான் நுண்ணறிவுப்பிரிவினா் சோதனை மேற்கொண்டனா்.

இதில், ஆண் பயணியொருவா் தனது ஆடையில் வடிவமைக்கப்பட்ட பிரத்யேக அறையில், 70 கிராம் பசைவடிவிலான தங்கத்தை மறைத்து கடத்தி வந்தது தெரியவந்தது. அவற்றின் மதிப்பு ரூ. 4.42 லட்சமாகும். அவற்றை பறிமுதல் செய்த சுங்கத்துறையினா் வழக்குப் பதிவு செய்து விசாரணை மேற்கொண்டுள்ளனா்.