மாநில அளவிலான கூடைப்பந்தாட்ட போட்டி

கும்பகோணத்தில் பகல் மற்றும் இரவு நேர மின்னொளியில் மாநில அளவிலான கூடைப்பந்தாட்ட போட்டி நடைபெற்றது. கும்பகோணம் நகர மேல்நிலைப்பள்ளி மைதானத்தில் அண்ணா கூடைப்பந்தாட்ட கழகம் மற்றும் மகாமகம் கூடைப்பந்தாட்ட கழகம் இணைந்து நடத்திய பகல் மற்றும் இரவு நேர மின்னொளியில் மாநில அளவிலான கூடைப்பந்தாட்ட போட்டி கடந்த வெள்ளிக்கிழமை முதல் ஞாயிற்றுக்கிழமை வரை தொடர்ந்து மூன்று நாட்கள் நடைபெற்றது. இப்போட்டியின் இறுதி நாளான ஞாயிற்றுக்கிழமை மாலை பரிசளிப்பு விழா நடைபெற்றது.

விழாவில் கும்பகோணம் எம்எல்ஏ சாக்கோட்டை அன்பழகன் மற்றும் மாநகர திமுக செயலாளர் சு.ப.தமிழழகன் ஆகியோர் சிறப்பு அழைப்பாளராக பங்கேற்று மாநில அளவிலான கூடைப்பந்தாட்ட போட்டியில் முதலிடம் பெற்ற சென்னை எஸ்.ஆர்.எம் பல்கலைக்கழக அணியினருக்கு தஞ்சாவூர் வடக்கு மாவட்ட திமுக விளையாட்டு மேம்பாட்டு அணி சார்பில் ரூ.20,000 ரொக்க பரிசு மற்றும் கோப்பையும், இரண்டாம் இடம் பெற்ற வத்தலகுண்டு யங்ஸ்டர்ஸ் பிபிசி அணியினருக்கு ரதிமீனா டிராவல்ஸ் இயக்குனர் பி.எஸ்.சேகர் சார்பில் ரூ.15,000 ரொக்க பரிசு மற்றும் கோப்பையும், மூன்றாம் இடம் பெற்ற சென்னை ஜே.பி.ஆர் பல்கலைக்கழக அணியினருக்கு டாக்டர் பாலகணேஷ் சார்பில் ரூ.12,000 ரொக்க பரிசு மற்றும் கோப்பையும், நான்காம் இடம் பெற்ற கும்பகோணம் இரா.துரை ஸ்போர்ட்ஸ் அகாடமி அணியினருக்கு ரொசாரியோ சார்பில் ரூ.10,000 ரொக்க பரிசு மற்றும் கோப்பை வழங்கி பாராட்டினர்.

இந்த விழாவில் தஞ்சாவூர் வடக்கு மாவட்ட திமுக விளையாட்டு மேம்பாட்டு அணி அமைப்பாளர் சிவக்குமார், துணை அமைப்பாளர் சாமிநாதன், மாநில பொதுக்குழு உறுப்பினர் ராஜேந்திரன், மூத்த விளையாட்டு வீரர் சாமிநாதன் உள்ளிட்ட பலர் கலந்து கொண்டனர். முன்னாள் உடற்கல்வி ஆசிரியர் பாலகுரு போட்டியை தொகுத்து வழங்கினார். உடற்கல்வி இயக்குனர் சௌந்தர்ராஜன் போட்டியின் நடுவராக பங்கேற்றார்.