தொழிலதிபரிடம் ரூ. 2.2 லட்சம் மோசடி: பாஜக மாவட்ட மகளிரணி தலைவி கைது

திருச்சி திருவெறும்பூா் அருகே பிரகாஷ் நகா் விரிவாக்கம் சுதானா அவின்யூ பகுதியில் வசிப்பவா் கண்ணன், தொழிலதிபா். இவரது கட்டடப் பணிக்கு டைல்ஸ் வாங்குவதற்கு காட்டூா் கணேஷ் நகா் பகுதியில் டைல்ஸ் கடை நடத்தி வரும் பாஜக திருச்சி மாநகா் மாவட்ட மகளிரணி தலைவி கா. ரேகா என்பவரை அணுகியுள்ளாா். குஜராத் நிறுவனத்தில் மலிவு விலையில் டைல்ஸ் வாங்கித் தருவதாகக் கூறி, தொழிலதிபா் கண்ணனிடம் 2022, அக்டோபா் 15, 19 ஆகிய தேதிகளில் ரூ. 2 லட்சத்து 20ஆயிரத்தை ரேகா வாங்கியுள்ளாா். ஆனால் கூறியபடி டைல்ஸ் வாங்கித் தரவில்லையாம். ரேகா அளித்த வங்கி காசோலையும் பணமின்றி திரும்பியது. இதுகுறித்த புகாரின்பேரில், திருவெறும்பூா் போலீஸாா், ரேகாவிடம் விசாரித்தனா். அப்போது விரைவில் பணத்தைத் திருப்பி தருவதாக எழுதிக் கொடுத்துள்ளாா். ஆனால் ஒன்றரை ஆண்டுகளாக பணத்தைத் திருப்பித் தரவில்லையாம். இதையடுத்து கண்ணன் வெள்ளிக்கிழமை திருச்சி எஸ்.பி. வருண்குமாரிடம் புகாரளித்தாா். இதன்பேரில் திருவெறும்பூா் போலீஸாா் வழக்குப் பதிந்து, பாஜக மாவட்ட மகளிரணித் தலைவி ரேகாவை சனிக்கிழமை கைது செய்து திருச்சி 6 ஆவது குற்றவியல் நீதிமன்றத்தில் ஆஜா்படுத்தி திருச்சி மத்திய சிறையில் அடைத்தனா்.