சாலை விபத்தில் வடமாநில இளைஞர் பலி.

பரமத்தி வேலூர்,செப்.04: பீகார் மாநிலம், கயா மாவட்டம், திகிரிதானே கிராமத்தை சேர்ந்தவர்  நந்திலால் மாஞ்சி(17). இவர் கடந்த ஒருவாரமாக பரமத்திவேலூர் தாலுகா, ஜேடர்பாளையம் அருகே உள்ள அய்யம்பாளையத்தில் செல்வராஜ் என்பவரது வெல்லம் தயாரிக்கும் ஆலைகொட்டைகையில் கூலிவேலை பார்த்து வந்துள்ளார். நேற்று முன்தினம் (திங்கட்கிழமை) மாலை கபிலர்மலை வாரச்சந்தைக்கு வந்து காய்கறி மற்றும் மளிகை பொருட்களை வாங்கியுள்ளார். பின்னர் ஜேடர்பாளையம் நோக்கி சென்ற ஒரு சரக்கு ஆட்டோவில் அமர்ந்து  கபிலர்மலையில் இருந்து ஜேடர்பாளையம் செல்லும் சாலையில் நேற்று முன்தினம் இரவு சென்று கொண்டிருந்தார். சரக்கு ஆட்டோ ஜேடர்பாளையம் அருகே உள்ள ஒரு திருமண மண்டபம் அருகே சென்று கொண்டிருந்தபோது திடீரென சாலையின் இடது பக்கத்தில் உள்ள மின் கம்பத்தில் டிரைவரின் கட்டுப்பாட்டை இழந்து மோதியுள்ளது.‌ அப்போது சரக்கு ஆட்டோவில் அமர்ந்து சென்ற நந்திலால் மாஞ்சிக்கு தலையில் அடிபட்டு படுகாயம் அடைந்து உயிருக்கு போராடியுள்ளார். இதை பார்த்த அவ்வழியாக வந்தவர்கள் அவரை காப்பாற்றி வேலூர் அரசு மருத்துவமனையில் சேர்த்தனர். அங்கு அவரை பரிசோதனை செய்த டாக்டர்கள் அவர் வரும் வழியிலேயே இறந்து விட்டதாக தெரிவித்துள்ளனர்.  சம்பவம் குறித்து ஜேடர்பாளையம் போலீசார் வழக்கு பதிவு செய்து தப்பியோடிய சரக்கு ஆட்டோ டிரைவரை தேடி வருகின்றனர்.