ஜேடர்பாளையம் அருகே சாலை விபத்தில் மூன்று இளைஞர்கள் பலி.

பரமத்தி வேலூர், நவ.16: நாமக்கல் மாவட்டம் பரமத்தி வேலூர் தாலுகா கபிலர்மலை அருகே உள்ள கருப்பம்பாளையத்தை சேர்ந்தவர் முருகேசன் என்பவர் மகன் சிவா (19),அதே ஊரை சேர்ந்த மணிகண்டன் மகன் பூமிஸ் (21), சிறுகிணத்துபாளையத்தைச் சேர்ந்த மோகன் என்பவரது மகன் சக்திநாதன் (18). ஆகிய மூன்று பேரும் மணவறை அலங்காரம் செய்யும் வேலை பார்த்து வந்தனர். இந்த நிலையில் நேற்று இரவு சரக்கு வாகனத்தில் ( தோஸ்த் ) ஈரோடு சென்று விட்டு அதிகாலை கபிலர்மலை நோக்கி வந்து கொண்டிருந்தனர். அப்போது ஜேடர்பாளையம் அருகே உள்ள தண்ணீர் பந்தல் அருகே வந்து கொண்டிருந்த போது பரமத்தியில் இருந்து ஜேடர்பாளையம் நோக்கிச் சென்ற லாரியின் மீது எதிர்பாராத விதமாக இவர்கள் சென்ற வாகனம் மோதியது. இதில் பலத்த காயம் ஏற்பட்டு சம்பவ இடத்திலேயே சிவா மற்றும் சக்தி நாதன் உயிரிழந்தனர். பலத்த காயமடைந்த பூமிசை அருகில் இருந்தவர்கள் மீட்டு ஆம்புலன்ஸ் மூலம் நாமக்கல் அரசு மருத்துவக் கல்லூரி மருத்துவமனைக்கு சிகிச்சைக்காக அனுப்பி வைத்தனர். ஆனால் அவர் செல்லும் வழியிலேயே உயிரிழந்தார். தகவல் அறிந்து சம்பவ இடத்திற்கு வந்த ஜேடர்பாளையம் போலீசார் சிவா மற்றும் சக்திநாதன் உடலை மீட்டு பரமத்திவேலூர் அரசு மருத்துவமனைக்கு பிரேத பரிசோதனைக்கு அனுப்பி வைத்தனர். மேலும் பூமிசின் உடல் நாமக்கல் அரசு மருத்துவக் கல்லூரி மருத்துவமனையில் பிரேத பரிசோதனை சேர்க்கப்பட்டது. சம்பவம் குறித்து போலீசார் வழக்கு பதிவு செய்து விசாரணை நடத்தி வருகின்றனர்.