கோவையில் அக்னிவீர் ராணுவத்திற்கு ஆட்கள் சேர்ப்பு முகாம் வருகிற 1-ந் தேதி முதல் 5-ந் தேதி வரை நடைபெறுகிறது

கோவையில் அக்னிவீர் ராணுவத்திற்கு ஆட்கள் சேர்ப்பு முகாம் வருகிற 1-ந் தேதி முதல் 5-ந் தேதி வரை நடைபெறுகிறது என மாவட்ட கலெக்டர் பிருந்தாதேவி தெரிவித்துள்ளார். இதுகுறித்து அவர் வெளியிட்டுள்ள செய்திக்குறிப்பில் கூறியிருப்பதாவது:- கோவை ராணுவ ஆள்சேர்ப்பு அலுவலகத்தின் மூலம் கோவையில் உள்ள நேரு ஸ்டேடியத்தில் 1.8.2024 முதல் 5.8.2024 வரை அக்னிவீர் ஜெனரல் டியூட்டி, அக்னிவீர் டெக்னிக்கல், அக்னிவீர் அலுவலக உதவியாளர் மற்றும் ஸ்டோர் கீப்பர் டெக்னிகல், அக்னிவீர் டிரேட்ஸ்மேன்களுக்கு ஆட்கள் சேர்ப்பு முகாம் நடைபெறுகிறது. இந்த பதவிகளுக்கு 10-ம் வகுப்பு தேர்ச்சி மற்றும் அக்னிவீர் டிரேட்ஸ்மேன்களுக்கு 8-ம் வகுப்பு தேர்ச்சி பெற்றிருக்க வேண்டும். இதன் அடிப்படையில் ஆள்சேர்ப்பு முகாம் நடைபெற உள்ளது. இந்த அக்னிவீர் ராணுவத்திற்கு ஆள்சேர்ப்பு முகாமில், நீலகிரி, ஈரோடு, கிருஷ்ணகிரி, தர்மபுரி, சேலம், நாமக்கல், திண்டுக்கல், மதுரை, தேனி, திருப்பூர் மற்றும் கோவை ஆகிய 11 மாவட்டங்களை சேர்ந்த விண்ணப்பதாரர்கள், முகாமில் கலந்து கொள்வதற்காக அனுமதி சீட்டு பெற்றவர்கள் அதனை கட்டாயம் கொண்டு வர வேண்டும். 12.2.2024 தேதியிட்ட விவரப்படி முகாம் நடைபெறும் இடத்திற்கு அனைத்து ஆவணங்களும் www.joinindianarmy.nic.in - என்ற இணையதள முகவரியில் பதிவேற்றப்பட்டுள்ளது. அணுக வேண்டாம் ஆள்சேர்ப்பு முற்றிலும் வெளிப்படையானது மற்றும் நியாயமானது. இதில் விண்ணப்பதாரர்களை தேர்ச்சி பெற அல்லது பதிவு செய்ய தனி முகவர்கள் உதவ முடியும் என்று கூறும் ஏமாற்றுக்காரர்கள் அல்லது மோசடிதாரர்களிடமிருந்து பாதுகாப்பாக இருக்க வேண்டும். முகவர்களுக்கு எந்த பங்கும் இல்லை. மேலும் விண்ணப்பதாரர்கள் அத்தகைய முகவர்களிடம் அணுக வேண்டாம் என்று அறிவுறுத்தப்படுகிறது. இவ்வாறு அதில் கூறப்பட்டுள்ளது.