தூத்துக்குடியில் செல்போன் பறிக்க முயற்சி: 2 பேர் கைது

தூத்துக்குடியில் வாலிபரிடம் செல்போன் பறிக்க முயன்ற 2பேரை போலீசார் கைது செய்தனர். திருநெல்வேலி மாவட்டம் சேரன் மகாதேவியைச் சேர்ந்தவர் முகமது பாட்ஷா (28). தனது தங்கையைப் பார்ப்பதற்காக தூத்துக்குடிக்கு வந்த அவர், வி.இ.சாலையில் நடந்து சென்றாராம். அப்போது அவரது கையிலிருந்த செல்போனை 2 மர்ம நபர்கள் பறிக்க முயன்றனராம். முகமது பாட்ஷா சுதாரித்துக் கொண்டு சப்தமிட்டதால் அவர்கள் செல்போனை பறிக்க முடியாமல் தப்பியோடினராம். புகாரின்பேரில் மத்திய பாகம் போலீசார் வழக்குப் பதிந்து விசாரணை நடத்தி தூத்துக்குடி பக்கிள்புரத்தைச் சேர்ந்த ரத்தின சிவா (20), கீழ சண்முக புரத்தைச் சேர்ந்த அஸ்வின் (20) ஆகியோரைக் கைது செய்தனர்.