புத்தகத் திருவிழா போட்டிகள்: 2397 மாணவ மாணவியர் பங்கேற்பு!

தூத்துக்குடி மாவட்டத்தில் 5 ஆம் வகுப்பு முதல் 12 ஆம் வகுப்பு வரை பயில்கின்ற மாணவர்களுக்கு புத்தகத் திருவிழா சார்பான போட்டிகள் 13 வட்டார வள மையங்களிலும் நடைபெற்றது. தூத்துக்குடி மாவட்டத்தில் வரும் அக்டோபர் மாதம் 3 ஆம் தேதி முதல் 13 ஆம் தேதி வரை தூத்துக்குடி சங்கரப்பேரி விலக்கு பகுதியில் நடைபெறவுள்ள புத்தகத் திருவிழாவினை முன்னிட்டு மாணவர்களுக்கு ஆர்வமூட்டும் விதமாக அனைத்து வகைப் பள்ளிகளிலும் 5 ஆம் வகுப்பு முதல் 12 ஆம் வகுப்பு வரை பயில்கின்ற மாணவர்களுக்கு புத்தகத் திருவிழா சார்பான போட்டிகள் 13 வட்டார வள மையங்களிலும் நடைபெற்றது. இப்போட்டிகள் அனைத்தும் தூத்துக்குடி மாவட்ட ஆட்சித் தலைவர் அவர்களின் வழிகாட்டுதல்படி நடைபெற்றன. பேச்சுப்போட்டி, கவிதைப் போட்டி, கட்டுரைப் போட்டி, வினாடிவினா போட்டி, ஓவியப்போட்டி, நூல் பெயர் நூலாசிரியர் பெயர் நினைவு கூர்தல் போட்டி. ஒப்புவித்தல் போட்டி ஆகிய போட்டிகளில் 2397 மாணவ மாணவியர் கலந்து கொண்டனர். ஒவ்வொரு வகைப் போட்டிகளிலும் முதல் மூன்று இடங்களைப் பிடித்த மாணவர்கள் புத்தகத் திருவிழாவின் போது நடைபெறவுள்ள மாவட்ட அளவிலான போட்டிகளில் பங்குபெறும் வாய்ப்பினைப் பெறுவார்கள். இப்போட்டிகள் சிறப்பாக நடைபெறுவதற்கு தலைமையாசிரியர்கள், வட்டாரக் கல்வி அலுவலர்கள், வட்டார வள மைய மேற்பார்வையாளர்கள் ஆகியோர் சிறப்பான ஏற்பாடுகளைச் செய்திருந்தனர்.