தகராறில் ஈடுபட்ட 2 பேர் கைது!

திருப்பூர் முருகம்பாளையம் பகுதியைச் சேர்ந்த செம்மல் (44) பனியன் தொழிலாளி. இவர் நேற்று முன்தினம் இரவு தனது வீட்டின் முன்பு செல்போனில் பேசிக்கொண்டு இருந்ததாக  தெரிகிறது. அப்பொழுது  குடிபோதையில் அங்கு வந்த முருகம்பாளையம் பாரக்காடு பகுதியைச் சேர்ந்த கருப்புசாமி ( 40), முத்துசாமி  (41) ஆகியோர்  சாலையில் நின்று பேசிக் கொண்டிருந்த செம்மலிடம் தகராறில்  ஈடுபட்டதாக தெரிகிறது. இதனால் செம்மல் மற்றும் அப்பகுதியில் இருந்தவர்கள் அவர்களை திட்டி அனுப்பி உள்ளனர்.

இதில் ஆத்திரம் அடைந்த இருவரும்  நண்பர்களை அழைத்துக் கொண்டு வந்து, வீட்டில் இருந்த செம்மலையும் அவரது மனைவியையும் தாக்கி உள்ளனர். இதில் தலையில் பலத்த காயமடைந்த செம்மல் திருப்பூர் அரசு மருத்துவமனையில் சிகிச்சை பெற்று வருகிறார். இது குறித்து செம்மல் கொடுத்த புகாரின் பேரில் வீரபாண்டி போலீசார் வழக்கு பதிவு செய்து கருப்புசாமி மற்றும் முத்துசாமியை கைது செய்து சிறையில் அடைத்தனர்.