பஸ் நேருக்கு நேர் மோதல் 32 பேர் காயம் !

கள்ளக்குறிச்சியில் கல்லுாரி பஸ் மீது, தனியார் பஸ் மோதிய விபத்தில் 32 பேர் காயமடைந்தனர். கள்ளக்குறிச்சி தீயணைப்பு நிலையம் அருகே நேற்று காலை 8:00 மணியளவில் தனியார் கல்லுாரி பஸ் சென்றது. பஸ்சில் கல்லுாரி மாணவிகள் சென்றனர். அப்போது, கச்சிராயபாளையத்தில் இருந்து பயணிகளுடன் வந்த தனியார் பஸ், கல்லுாரி பஸ் மீது மோதியது. இதில், கல்லுாரி பஸ்சில் இருந்த, குதிரைச்சந்தல் அருணா, 19; கீர்த்தனா, 18; விதர்ஷணா, 18; உட்பட 7 பேரும், தனியார் பஸ்சில் வந்த கச்சிராயபாளையம் கவுரி, 30; அண்ணாமலை, 70; தண்டபாணி, 61; கலையரசி, 36; உட்பட 25 பேர் காயமடைந்தனர். உடன், அனைவரும் கள்ளக்குறிச்சி அரசு மருத்துவக் கல்லுாரி மருத்துவமனையில் சேர்க்கப்பட்டனர்.தகவலறிந்த எம்.எல்.ஏ.,க்கள் கள்ளக்குறிச்சி, செந்தில்குமார், ரிஷிவந்தியம் வசந்தம் கார்த்திகேயன், நகர மன்ற தலைவர் சுப்ராயலு ஆகியோர் மருத்துவமனைக்கு சென்று சிகிச்சை பெற்று வந்தவர்களின் உடல் நலம் குறித்து கேட்டறிந்தனர்.விபத்து குறித்து கள்ளக்குறிச்சி போலீசார் விசாரிக்கின்றனர்.