90ஸ் கிட்ஸ்களுக்கு விரைவில் திருமணம் - பஞ்சாங்க கணித ஜோதிடர் உறுதி

திருப்பூர், பாரம்பரிய வள்ளுவர் குல ஜோதிடர்கள் சங்கம் மற்றும் திருப்பூர் மாவட்ட வள்ளுவர் குல ஜோதிடர்கள் கூட்டம் திருப்பூரில் நேற்று நடந்தது. இதில் திருப்பூர் மாவட்ட தலைவர் பாலகிருஷ்ணன், நிறுவனத் தலைவர் ஜெயம் த. பழனிசாமி, தலைமை ஆலோசகர்கள் வடிவேல், கோபால்சாமி, செயலாளர் பாலமுருகன், பேராசிரியர் ஜோதிடர் ஸ்ரீ ரவிச்சந்திரா  ஆகியோர் கலந்து கொண்டு சிறப்புரையாற்றினர்.

இதன் பின்னர் பஞ்சாங்க கணிதர் மதன் அகத்தியர் நிருபர்களுக்கு பேட்டி அளித்தார். அப்போது அவர் கூறியதாவது, 2024-25 ஆம் ஆண்டு 17 புயல்கள் வரும். இதில் 11 புயல்கள் வலுவற்றது. 6 புயல்கள் வலுவானது. உலகம் முழுவதும் இந்த ஆண்டு பெரும் அழிவுகள் இருந்தாலும் மிதுன ராசி திருவாதிரை நட்சத்திரத்தில் உள்ள இந்தியாவிற்கு அழிவு குறைவாக இருக்கும்.  மழையின் அளவை பொருத்தவரை எங்கெல்லாம் கடந்த ஆண்டு அதிக அளவு மழை பெய்ததோ அங்கெல்லாம் குறைவாகவும் , குறைவாக பெய்த இடங்களில் அதிகமாகவும் பெய்யும்.

இந்தியாவில் விலை வாசியானது நிலையானதாக இருக்காது. மத்தியிலும் மாநிலத்திலும் ஆட்சி மாற்றம் ஏற்படுவதற்கான வாய்ப்புகள் குறைவு. 2026-ம் ஆண்டுக்குள் 90 சதவீத 90ஸ் கிட்ஸ்சுகளுக்கு திருமணம் நடக்கும். இதற்கு நான் கேரண்டி. அதற்காக மல்லிகை பூவை  இறைவன் முன் வைத்து பெரியோர்களிடம் ஆசி பெற்று வணங்க வேண்டும். என்றார். முன்னதாக வள்ளுவர் குல பஞ்சாங்கம் வெளியிடப்பட்டது.