அணைக்கட்டு அருகே மோட்டார் சைக்கிள் திருடிய வாலிபர் கைது

வேலூர் மாவட்டம் அணைக்கட்டு தாலுகா கந்தனேரி பிள்ளையார்கோவில் தெருவை சேர்ந்தவர் சங்கரன் (57), செதுவாலை இந்திரா நகர் பகுதியை சேர்ந்தவர் சுரேந்தர் (22). இவர்கள் இருவரும் தங்களது மோட்டார்சைக்கிள்களை விரிஞ்சிபுரம் மாரியம்மன் கோவில் தெருவில் சம்பவத்தன்று நிறுத்தி இருந்தனர்.

இந்த மோட்டார்சைக்கிள்களை மர்மநபர்கள் திருடிச் சென்றனர். இதுகுறித்து அவர்கள் விரிஞ்சிபுரம் காவல் நிலையத்தில் தனித்தனியே புகார் செய்தனர். அதன்பேரில் போலீசார் வழக்குப்பதிவு செய்து விசாரணை நடத்தினர். விசாரணையில் மோட்டார்சைக்கிள்களை திருடியது ஆந்திர மாநிலம் சித்தூர் குடிபாலா பகுதியை சேர்ந்த ஜெயசூரி (26) என்பது தெரியவந்தது. இதையடுத்து அவரை போலீசார் கைது செய்தனர். இதையடுத்து அவரிடம் இருந்து 2 மோட்டார்சைக்கிளையும் பறிமுதல் செய்தனர். மேலும் இதுதொடர்பாக அவரிடம் விசாரணை நடத்தி வருகின்றனர்.