சேலம் போக்குவரத்து கழகம் சார்பில் மாணவர்களுக்கு ஆலோசனை

தமிழ்நாடு அரசு போக்குவரத்து கழக சேலம் கோட்டத்தின் சார்பில் எஸ்.எஸ்.எல்.சி. மற்றும் பிளஸ்-2 பொதுத்தேர்வு எழுத இருக்கும் பணியாளர்களின் குழந்தைகள் தன்னம்பிக்கையுடன் எதிர்கொள்ளும் விதமாக ஆலோசனை வழங்கும் நிகழ்ச்சி சேலம் மண்டல தலைமை அலுவலகத்தில் நடைபெற்றது.

நிகழ்ச்சிக்கு சேலம் மண்டல நிர்வாக இயக்குனர் பொன்முடி தலைமை தாங்கினார். இதில் விநாயகா மிஷன் பல்கலைக்கழக இயக்குனர் டாக்டர் செந்தில்குமார், ஹாட்புல்னஸ் இன்ஸ்டிடியூட் சேலம் மத்திய ஒருங்கிணைப்பாளர் கஸ்தூரி ஆகியோர் கலந்து கொண்டு பொதுத்தேர்வை தன்னம்பிக்கையுடன் எதிர்கொள்வது குறித்து மாணவர்களுக்கு ஆலோசனைகள் வழங்கினர்.

இதையடுத்து நிகழ்ச்சியில் கலந்து கொண்ட பணியாளர்களின் குழந்தைகளுக்கு தேர்வு எழுதுவதற்கு தேவையான பேனா, பென்சில் போன்றவை அடங்கிய பை வழங்கப்பட்டது. நிகழ்ச்சியில் போக்குவரத்து கழக சேலம் மண்டல முதுநிலை துணை மேலாளர், துணை மேலாளர்கள்,

உதவி மேலாளர்கள், அனைத்துத்துறை பணியாளர்கள் மற்றும் தொழிற்சங்க பிரதிநிதிகள் கலந்து கொண்டனர்.