போலீசாரிடம் குடிபோதையில் தகராறு செய்தவர் கைது

கெங்கவல்லி: சேலம் மாவட்டம் கெங்கவல்லி வட்டம் கெங்கவல்லி தம்மம்பட்டி அருகே கொண்டையம்பள்ளி ஊராட்சி பகுதியை சேர்ந்தவர் ஜெயராமன். இவருடைய மகன் கோவிந்தன் (வயது 28). இந்த நிலையில் கோவிந்தனுக்கும், அவருடைய மனைவிக்கும் இடையே குடும்ப தகராறு ஏற்பட்டதாக கூறப்படுகிறது. இதனால் மனைவி நேற்று கணவர் மீது தம்மம்பட்டி போலீசில் புகார் கொடுத்தார். இதையடுத்து கோவிந்தனை விசாரணைக்கு வருமாறு போலீசார் கூறினர். அதன்பேரில் அவர் போலீஸ் நிலையத்துக்கு குடிபோதையில் வந்தார். பின்னர் அங்கிருந்த போலீசாரிடம் வாக்குவாதம் செய்து தகராறில் ஈடுபட்டார். இதையடுத்து போலீசார் கோவிந்தன் மீது வழக்குப்பதிவு செய்து அவரை கைது செய்தனர்.