மின்சாரம் பாய்ந்து சென்ட்ரிங் தொழிலாளி உயிரிழப்பு

சேலம் மாவட்டம், காடையாம்பட்டி அருகே உள்ள பூசாரிபட்டி ஊராட்சிக்குட்பட்ட குப்பிநாயக்கனூர் பனமரத்துசாரி என்ற பகுதியில் வசிக்கும் செல்வராஜ் மகன் சிவக்குமார் என்பவருடைய வீட்டிற்கு சென்ட்ரிங் வேலை செய்வதற்காக வாழையான் தோப்பு அருகே உள்ள கிஷான் காலனி, எம்ஜிஆர் நகர் பகுதியை சேர்ந்த நைனாமலை என்பவருடைய மகன் அருள் உட்பட சிலர் அவரது கட்டிடத்திற்கு வந்துள்ளனர். பின்னர் வேலை செய்து கொண்டிருந்த பொழுது அவரது வீட்டிற்கு மேலே சென்று கொண்டிருந்த மின்சார கம்பி உரசி அருள் என்பவர் மீது மின்சாரம் பாய்ந்து அவர் தூக்கி வீசப்பட்டார். இதையடுத்து அருளை அக்கம்பக்கம் உள்ளவர்கள் மீட்டு ஓமலூர் அரசு மருத்துவமனைக்கு கொண்டு சென்ற போது அங்கு பரிசோதனை செய்த அரசு மருத்துவர்கள் ஏற்கனவே அருள் இறந்து விட்டதாக தெரிவித்தனர். மேலும் படுகாயமடைந்த மற்றொருவர் ஓமலூர் அரசு மருத்துவமனையில் உள் நோயாளியாக சிகிச்சை பெற்று வருகிறார். சம்பவம் குறித்து தீவட்டிப்பட்டி போலீசார் வழக்கு பதிவு செய்து  விசாரணை மேற்கொண்டு வருகின்றனர்.