கோவில் திருவிழாவில் கோஷ்டி மோதல்!

வேலூர் மாவட்டம் ஒடுகத்தூரை அடுத்த கத்தாரிகுப்பம் அருகே உள்ள காளியம்மன்பட்டி கிராமத்தில் காளியம்மன் கோவில் கரக திருவிழா நடைபெற்றது. விழாவில் கலந்து கொள்ள அதேப்பகுதியை சேர்ந்த வல்லரசு என்பவர் மேலரசம்பட்டு கிராமத்தை சேர்ந்த தனது நண்பர்களான ராகுல், விஷ்ணு, வெங்கடேஷ், சுரேஷ், ஆகாஷ், ஆனந்த், யுவராஜ் ஆகியோரை வரவழைத்து உள்ளார். அதேபோல் கத்தாரிகுப்பம் பகுதியை சேர்ந்த விஷால், ஜெகன், அபி, நவீன் ஆகியோரும் கலந்து கொண்டுள்ளனர். இவர்கள் இரண்டு தரப்பினருக்கும் இடையே ஏற்கனவே முன்விரோதம் இருந்து வந்துள்ளது. இந்தநிலையில் காளியம்மன் கோவில் திருவிழாவில் இருதரப்பினருக்கும் இடையே மோதல் ஏற்பட்டது. இதில ஒருவரை ஒருவர் கைகளாலும், கட்டையாலும் தாக்கிக் கொண்டனர். அப்போது விஷால் அவரது நண்பர்கள் பிளேடால் ராகுலை சரமாரியாக வெட்டியுள்ளனர். இதில், ராகுலுக்கு உடல் முழுவதும் பலத்த வெட்டு காயங்கள் ஏற்பட்டு, ஒடுகத்தூர் அரசு ஆரம்ப சுகாதார நிலையத்தில் அனுமதிக்கப்பட்டு பின்னர், மேல்சிகிச்சைக்காக வேலூர் அடுக்கம்பாறை அரசு மருத்துவமனைக்கு அனுப்பி வைக்கப்பட்டார்.இதுதொடர்பாக வேப்பங்குப்பம் காவல் நிலையத்தில் ராகுல் புகார் கொடுத்தார். அதன்பேரில், போலீசார் வழக்குப்பதிந்து விசாரணை நடத்தி வருகின்றனர்.