அணைக்கட்டு: மோட்டார் சைக்கிள் மீது கார் மோதி தொழிலாளி பலி!

வேலூர் மாவட்டம் பள்ளிகொண்டாவை அடுத்த வேலங்காடு பனந்தோப்பு பட்டி கிராமத்தைச் சேர்ந்தவர் ராஜேஷ் (40). இவருக்கு ராதிகா என்ற மனைவி மற்றும் மகன், மகள் உள்ளனர். ராஜேஷ் கடந்த 10 ஆண்டுகளாக சிங்கப்பூரில் வெல்டிங் வேலை செய்து வந்தார்.

இவர் தனது தம்பியின் நினைநாள் மற்றும் கோவில் திருவிழா ஆகியவற்றுக்காக ஒரு மாதம் விடுமுறையில் வந்துள்ளார். இந்த நிலையில் நேற்று முன்தினம் இரவு வீட்டுக்கு தேவையான மளிகை சாமான்கள் வாங்குவதற்காக மோட்டார் சைக்கிளில் பள்ளிகொண்டா நோக்கி சென்று கொண்டிருந்தார்.

கந்தனேரியை அடுத்த கன்னிகாபுரம் பகுதியில் சென்றபோது எதிரில் வந்த கார் ராஜேஷ் ஓட்டிச் சென்ற மோட்டார்சைக்கிள் மீது மோதியது. இதில் படுகாயமடைந்த அவரை வேலூர் தனியார் மருத்துவமனையில் சேர்த்தனர். அங்கு சிகிச்சை பலனின்றி நேற்று பரிதாபமாக உயிரிழந்தார்.

விபத்து குறித்து அவரது மனைவி ராதிகா பள்ளிகொண்டா காவல் நிலையத்தில் இன்று கொடுத்த புகாரின் பேரில் சப்-இன்ஸ்பெக்டர் ஆறுமுகம் வழக்குப்பதிவு செய்து விசாரணை மேற்கொண்டு வருகின்றார். வெளிநாட்டில் இருந்து திருவிழாவை காண வந்தவர் விபத்தில் உயிரிழந்த சம்பவம் சோகத்தை ஏற்படுத்தி உள்ளது.