அ.தி.மு.க.வுக்கு ஆதரவாக தேர்தல் பிரசாரம் செய்ய முடிவு !

தமிழ்நாடு தொழிற்சங்க உரிமை பாதுகாப்பு கூட்டமைப்பு சார்பில் மாநில நிர்வாகிகள் ஆலோசனை கூட்டம் சேலம் 4 ரோடு சாமுண்டி காம்ப்ளக்ஸ் லட்சுமி அரங்கத்தில் நடந்தது.

மாநில தலைவர் ஏ.கதிர்வேல் தலைமையில் நடந்தது. இந்த கூட்டத்தில் பொதுச்செயலாளர் ராமகவுண்டர், பொருளாளர் செல்வம் மற்றும் தொழிற்சங்க நிர்வாகிகள் பலர் கலந்து கொண்டனர்.

இக்கூட்டத்தில், நாடாளுமன்ற தேர்தலில் தமிழ்நாடு தொழிற்சங்க உரிமை பாதுகாப்பு கூட்டமைப்பு சார்பில் அ.தி.மு.க.பொதுச்செயலாளர் எடப்பாடி பழனிசாமியை சந்தித்து அ.தி.மு.க.வுக்கு ஆதரவு அளிப்பது எனவும், அ.தி.மு.க. கூட்டணி வேட்பாளர்களின் வெற்றிக்காக அனைத்து தொகுதிகளிலும் கூட்டமைப்பு நிர்வாகிகள் தேர்தல் பிரசாரத்தில் ஈடுபடுவது எனவும் முடிவு செய்யப்பட்டது.

மேலும், கட்டுமானம் மற்றும் அமைப்புசாரா தொழிலாளர்கள் அனைவரும் இரட்டை இலை சின்னத்திற்கு வாக்களித்து அ.தி.மு.க. வேட்பாளர்கள் வெற்றி பெற அயராது பாடுபடுவோம் என கூட்டத்தில் தீர்மானம் நிறைவேற்றப்பட்டது.