வெண்ணந்தூரில் வளர்ச்சி திட்டப்பணிகள் - ஆட்சியர் ச.உமா ஆய்வு

நாமக்கல் மாவட்டம், வெண்ணந்தூர், நாமகிரிப்பேட்டை, சேந்தமங்கலம் ஆகிய ஊராட்சி ஒன்றியத்திற்குட்பட்ட பகுதிகளில் மாவட்ட ஆட்சித்தலைவர் மருத்துவர் ச.உமா பல்வேறு வளர்ச்சித்திட்ட பணிகள் குறித்து பார்வையிட்டு ஆய்வு மேற்கொண்டார்.

வெண்ணந்தூர் ஊராட்சி ஒன்றியம், நெ.3.கொமாரபாளையம் ஊராட்சி, கோம்பைக்காடு பகுதியில் சட்டமன்ற உறுப்பினர் தொகுதி மேம்பாட்டு திட்டத்தின் கீழ் ரூ.9.60 லட்சம் மதிப்பீட்டில் தொடக்கப்பள்ளி அருகில் விநாயகர் கோயில் சுற்றி பேவர் பிளாக் அமைத்து தடுப்பு சுவர் அமைக்கப்பட்டுள்ளதை மாவட்ட ஆட்சித்தலைவர் மருத்துவர் ச.உமா பார்வையிட்டு ஆய்வு மேற்கொண்டார்.

தொடர்ந்து, நெ.3.கொமாரபாளையம் ஊராட்சி, அ.கோம்பைக்காடு ஊராட்சி ஒன்றியத் தொடக்கப்பள்ளியில் காலை உணவு திட்ட சமையல் கூடத்தை பார்வையிட்டு, மாணவர்களுக்காக தயார் செய்யப்பட்டிருந்த உணவின் தரம் குறித்து ஆய்வு மேற்கொண்டார். மேலும், பள்ளி மாணவ, மாணவியர்களின் வருகை பதிவேடு, ஆசிரியர்களுக்கான வருகை பதிவேடுகளையும் பார்வையிட்டு ஆய்வு செய்த ஆட்சியர் மாணவர்களிடம் தங்களது புத்தகத்தை வைத்து படித்து காட்டச் சொல்லி கேட்டு, கலந்துரையாடினார்.