சாராயம் கடத்தியவர் கைது

சங்கராபுரம் பகுதியில் ஆட்டோவில் சாராயம் கடத்தப்படுவதாக போலீசாருக்கு தகவல் கிடைத்தது.அதனைத் தொடர்ந்து, கள்ளக்குறிச்சி மதுவிலக்கு அமலாக்கப் பிரிவு இன்ஸ்பெக்டர் கவிதா மற்றும் போலீசார், கரடிசித்துார் - செல்லம்பட்டு சாலையில் நேற்று அதிகாலை 5:00 மணியளவில் வாகன சோதனையில் ஈடுபட்டனர்.

அப்போது, அந்த வழியாக வந்த ஆட்டோவை நிறுத்திய போது, டிரைவர் தப்பியோடினார். ஆட்டோவில் இருந்த மற்றொரு நபரைப் பிடித்து விசாரித்தனர். அதில் அவர், புதுப்பாலப்பட்டைச் சேர்ந்த பெருமாள், 52; என்பதும், ஆட்டோவில் 4 கார் டியூப்களில் 80 லிட்டர் சாராயத்தை விற்பனைக்காக கடத்தி சென்றதும் தெரிந்தது. உடன் பெருமாளை கைது செய்து, 80 லிட்டர் சாராயம், கடத்தலுக்கு பயன்படுத்திய ஆட்டோ ஆகியவற்றை பறிமுதல் செய்தனர். மேலும், தப்பி ஓடிய ஆட்டோ டிரைவர் மோட்டாம்பட்டியைச் சேர்ந்த பூபதி மகன் சுமன், 21; என்பவரை தேடி வருகின்றனர்.