பள்ளி குழந்தைகளுக்கு பாடம் எடுத்த எம் பி ஜோதிமணி

கரூர் மாவட்டம், கடவூர் ஊராட்சி ஒன்றியத்திற்குட்பட்ட தரகம்பட்டி ஊராட்சியில் உள்ள சங்கிபூசாரியூர் பகுதியில் செயல்படும் ஊராட்சி ஒன்றிய துவக்க பள்ளிக்கு திடீர் என சென்றார் கரூர் நாடாளுமன்ற உறுப்பினர் ஜோதிமணி. அப்போது பள்ளி ஆசிரியை மாணாக்கர்களுக்கு பாடம் நடத்திக் கொண்டிருந்தார். பள்ளி மாணாக்கர்களிடம் தன்னை அறிமுகம் செய்து கொண்டு, பள்ளியில் பயிலும் பாடங்கள் தொடர்பாக சில வினாக்களை எழுப்பினார். பிறகு பாரதியார் பாடலான "அச்சமில்லை, அச்சமில்லை" என்ற பாடலை பள்ளி மாணாக்கர்களுக்கு பாடம் நடத்திவிட்டு, மாணாக்கர்களிடம் நீங்கள் எதிர்காலத்தில் அச்சம் இல்லாமல் அனைத்து விஷயங்களையும் எதிர்கொள்ள வேண்டும் என ஆலோசனை கூறினார். இந்த நிகழ்ச்சியில் உள்ளாட்சி பிரதிநிதிகள், அப்பகுதி பொது மக்கள் கலந்து கொண்டனர்.