வெள்ளி வியாபாரி வீட்டில் கொள்ளை

சேலம் அம்மாபேட்டை பிள்ளையார் கோவில் தெருவை சேர்ந்தவர் பாபுலால். வெள்ளி வியாபாரி. இவருடைய மனைவி சரோஜா (வயது 50). கணவன், மனைவி இருவரும் கடந்த 2-ந் தேதி வீட்டை பூட்டி விட்டு வெளியில் சென்றனர். பின்னர் வீட்டிற்கு வந்து பார்த்தபோது வீட்டில் வைக்கப்பட்டிருந்த 63 பவுன் நகை, ரூ.65 லட்சம் மற்றும் வெள்ளி பொருட்கள் கொள்ளையடிக்கப்பட்டது தெரிந்தது.

இதுகுறித்து சரோஜா அம்மாபேட்டை போலீசில் புகார் கொடுத்தார். அதன்பேரில் போலீசார் வழக்குப்பதிவு செய்து வீட்டு வேலை பார்த்த அம்மாபேட்டையை சேர்ந்த வள்ளி, அவரது கூட்டாளிகள் திலகா, பாபு, கார்த்தி, பாலா ஆகிய 5 பேரை ஏற்கனவே கைது செய்தனர். இந்த கொள்ளை வழக்கில் முக்கிய குற்றவாளியான கொள்ளை கும்பல் தலைவன் பொன்னம்மாபேட்டையை சேர்ந்த அப்சர், (35), சுரேஷ் (36) ஆகிய 2 பேரை போலீசார் நேற்று கைது செய்து அவர்களிடம் இருந்து 34 பவுன் நகை ரூ.24 ஆயிரம் ஆகியவற்றை மீட்டனர்.

தொடர்ந்து அவர்களிடம் போலீசார் விசாரணை நடத்தினர். அப்போது அவர்கள் வீட்டில் சரோஜா வைத்திருந்த ஆவணங்களை தீ வைத்து எரித்ததாக தெரிவித்துள்ளனர். தொடர்ந்து அவர்களிடம் போலீசார் தீவிர விசாரணை நடத்தி வருகின்றனர்.