சேலம் : ரெயிலில் 12 கிலோ கஞ்சா பறிமுதல்

வட மாநிலங்களில் இருந்து சேலம் வழியாக ரெயில்களில் கஞ்சா கடத்துப்படுவதை தடுக்கும் வகையில் ரெயில்வே பாதுகாப்பு படை போலீசார் சோதனை நடத்தி வருகின்றனர். சாலிமர்- திருவனந்தபுரம் எக்ஸ்பிரஸ் ரெயிலில் நேற்று போலீசார் சோதனை நடத்தினர். இந்த சோதனை சேலம் ரெயில் முதல் ஈரோடு ரெயில் நிலையம் வரை ஒவ்வொரு பெட்டியாக நடத்தப்பட்டது.

அப்போது முன்பதிவு இல்லா பெட்டியில் கழிவறை அருகே கேட்பாரற்று ஒரு பை கிடந்தது. அதனை போலீசார் திறந்து பார்த்தபோது 12 கிலோ கஞ்சா இருப்பது தெரிய வந்தது. கஞ்சாவை கடத்தி வந்தது யார் என்பது தெரியவில்லை. இதையடுத்து 12 கிலோ கஞ்சாவை போலீசார் பறிமுதல் செய்தனர். பின்னர் சேலம் போதை பொருள் தடுப்பு பிரிவு போலீசாரிடம் கஞ்சா ஒப்படைக்கப்பட்டது. அவர்கள் வழக்குப்பதிவு செய்து விசாரணை நடத்தினர்.