சேலம் : பெரியார் பல்கலைக்கழகத்தில் மாணவர் சேர்க்கை துவக்கம்

சேலம் பெரியார் பல்கலைக்கழக துணை வேந்தர் ஜெகநாதன் வெளியிட்டுள்ள செய்திக்குறிப்பில் கூறியிருப்பதாவது:- சேலம் பெரியார் பல்கலைக்கழகத்தில் உள்ள 27 துறைகள், தர்மபுரியில் உள்ள பெரியார் பல்கலைக்கழக பட்ட மேற்படிப்பு மற்றும் ஆராய்ச்சி மையம் ஆகியவற்றில் 2024-2025-ம் கல்வி ஆண்டிற்கான மாணவ, மாணவிகள் சேர்க்கை www.periyaruniversity.ac.in என்ற இணையதளத்தில் நேற்று முதல் தொடங்கியது.

பெரியார் பல்கலைக்கழகத்தில் உள்ள 27 துறைகளில் முதுகலை பட்டம், 5 ஆண்டுகள் ஒருங்கிணைந்த படிப்பு, முதுநிலை பட்டப்படிப்பு, பட்டப்படிப்பு மற்றும் சான்றிதழ் படிப்பு என மொத்தம் 43 பாடப்பிரிவுகளுக்கும், தர்மபுரி பெரியார் பல்கலைக்கழக மேற்படிப்பு மற்றும் ஆராய்ச்சி மையத்தில் உள்ள 8 ஆராய்ச்சி துறைகளில் 8 முதுநிலை பட்டப்படிப்புகளுக்கும் இதன் வழியாக மாணவர்களிடம் இருந்து விண்ணப்பங்கள் வரவேற்கப்படுகின்றன. விண்ணப்பத்திற்கான முழு விவரங்களை மேற்கண்ட இணையதளத்தில் தெரிந்து கொள்ளலாம்.இவ்வாறு அதில் கூறப்பட்டுள்ளது.