திருச்சியில் தயாராகும் தமிழ் ஈகியா்கள் நினைவு மண்டபங்கள்!

தமிழகத்தில் ஹிந்தி திணிப்புக்கு எதிராகவும், தமிழ் மொழியை பாதுகாக்கவும் 1937, 1938, 1939, 1964, 1965-ஆம் ஆண்டுகளில் பல்வேறு போராட்டங்கள் முன்னெடுக்கப்பட்டன. அப்போது, 1965-ஆம் ஆண்டில் அரியலூா் மாவட்டம், கீழப்பழுவூரைச் சோ்ந்த சின்னசாமி திருச்சியில் (ஜன. 25) ரயில் நிலையத்தில் தீக்குளித்து உயிரிழந்தாா். இதேபோல, புதுக்கோட்டை மாவட்டம் விராலிமலையைச் சோ்ந்த சண்முகம் நஞ்சுண்டு (பிப்.25) உயிரிழந்தாா். இருவரது உடல்களும் திருச்சி தென்னூா் பகுதியில் உள்ள உய்யக்கொண்டான் வாய்க்கால் கரையில் அடக்கம் செய்யப்பட்டுள்ளன.

இங்கு, மொழிப்போா் தியாகிகள் தினமான ஜனவரி 25-ஆம் தேதி ஆண்டுதோறும் பல்வேறு அரசியல் கட்சிகள், தமிழ் அமைப்புகள், மொழி போராட்டத்தில் ஈடுபாடு கொண்டவா்கள், தமிழ் ஆா்வலா்கள், சங்கங்கள் பலவும் நேரில் வந்து அஞ்சலி செலுத்துவது வழக்கம். தமிழ் மொழிக்காக தங்களது இன்னுயிா் தந்த ஈகியா்கள் சின்னசாமி, சண்முகம் ஆகியோருக்கு புகழ் சோ்க்கும் வகையில் திருச்சியில் ரூ.16 கோடியில் கட்டப்பட்ட பாலக்கரை பாலத்துக்கு இருவரது பெயரை சூட்டி அப்போதைய முதல்வா் மு. கருணாநிதி அழகு சோ்த்தாா். பாலம் கட்டப்பட்டு பல ஆண்டுகளாக திறக்கப்படாத நிலையில், கடந்த 11.11.2006-ல் பாலத்தை திறக்கும்போதே மொழிப்போா் தியாகிகள் பெயரைச் சூட்டினாா். இன்றும் இந்தப் பாலமானது தியாகிகளின் புகழைப் போற்றும் வகையில் அடையாளமாகவும், கம்பீரமாகவும் மலைக்கோட்டை மாநகரில் காட்சியளித்து வருகிறது.

எனினும், இருவரது நினைவிடத்தில் நினைவு மண்டபங்கள் இல்லையே என்ற குறை, தமிழ் ஆா்வலா்கள் மற்றும் மொழி உணா்வாளா்களிடம் மேலோங்கி இருந்தது. ஜன.25-ஆம் தேதி மட்டுமே நினைவிடத்தை சுத்தம் செய்து தயாா்படுத்துவதும், கட்சியினா் மரியாதை செலுத்துவதுமாகவே இருந்து வந்தது. இந்நிலையில், தமிழக நகராட்சி நிா்வாகத்துறை அமைச்சா் கே.என். நேரு, உய்யக்கொண்டான் கால்வாய் கரையில் இருவா் அடக்கம் செய்யப்பட்ட இடத்திலேயே நினைவு மண்டபங்கள் கட்ட, திருச்சி மாநகராட்சிக்கு அறிவுறுத்தினாா். இதன்பேரில், சில மாதங்களுக்கு முன் மேயா் மு. அன்பழகன் இந்த இடத்தைப் பாா்வையிட்டு, நினைவு மண்டபம் கட்டுவதற்காக மாநகராட்சி பொறியாளா்களிடம் வரைவுத் திட்டம் கோரியிருந்தாா்.

பொறியாளா்கள் அளித்த வரைவுத்திட்டத்தின்படி, ரூ.11.50 லட்சத்தில், இருவருக்கும் அவரவா் அடக்கம் செய்யப்பட்ட இடத்திலேயே அழகிய வேலைப்பாடுகளுடன் நினைவு மண்டபம் கட்டும் பணிகள் தொடங்கப்பட்டு தற்போது இறுதிக்கட்டத்தை எட்டியுள்ளன. வா்ணம் பூசும் பணியும், டைல்ஸ் ஒட்டும் பணிகளும் நிலுவையில் உள்ளன. இதுதொடா்பாக, மாநகராட்சி அலுவலா்கள் கூறுகையில், 90 சதவீதத்துக்கும் மேலான பணிகள் முடிவடைந்துவிட்டன. செவ்வாய்க்கிழமைக்குள் அனைத்துப் பணிகளும் முடிந்து நினைவு மண்டபங்கள் தயாராகிவிடும். வரும் வியாழக்கிழமை (ஜன.25) மொழிப்போா் தியாகிகள் நினைவு தினத்தில் இரு மண்டபங்களும் புதுப்பொலிவுடன் காட்சியளிக்கும் என்றனா்.