தஞ்சாவூர் : காங்கிரஸ் கட்சியின் 139-வது ஆண்டு தொடக்க விழா

தஞ்சாவூர் தெற்கு மாவட்ட காங்கிரஸ் சார்பில், தஞ்சாவூர் மேல வீதியில் உள்ள கட்சி அலுவலகத் தில் கொடி ஏற்றப்பட்டு, கேக் வெட்டப்பட்டு, அனைவருக்கும் இனிப்பு வழங்கப்பட்டது. தொடர்ந்து, தஞ்சாவூரில் உள்ள தேசத் தலைவர்களின் சிலைகளுக்கு மாலை அணிவிக்கப்பட்டது.

இந்நிகழ்ச்சிக்கு மாவட்ட துணைத் தலைவர் கோ.அன்பரசன் தலைமை வகித்தார். மாவட்ட பொதுச் செயலாளர் மோகன்ராஜ், மாநில பொதுக்குழு உறுப்பினர் கண்டிதம்பட்டு ஆர்.கோவிந்தராஜ், வட்டாரத் தலைவர் நாராயணசாமி உள்ளிட்டோர் கலந்துகொண்டனர். தஞ்சாவூர் மாநகர் மாவட்ட காங்கிரஸ் சார்பில், தஞ்சாவூர் ரயிலடியில் கட்சிக் கொடியேற்றி, இனிப்பு வழங்கப்பட்டது. இந்நிகழ்வில், மாவட்டத் தலைவர் பி.ஜி.ராஜேந்திரன், முன்னாள் மாவட்டத் தலைவர் நாஞ்சி கி.வரதராஜன் உள்ளிட்டோர் கலந்து கொண்டனர்.

தஞ்சாவூர் வடக்கு மாவட்ட காங்கிரஸ் சார்பில் கும்பகோணத்தில் உள்ள கட்சி அலுவலகத்தில் நடைபெற்ற நிகழ்ச்சியில், கும்பகோணம் மாநகராட்சி மேயர் க.சரவணன், கட்சியின் மாநகரத் தலைவர் மிர்ஷாவுதீன் முன்னிலை வகித்தனர். வடக்கு மாவட்டத் தலைவர் டி.ஆர்.லோக நாதன், கட்சிக் கொடியேற்றினார். மாநில பொதுக்குழு உறுப்பினர் தியாகராஜன், இளைஞர் காங்கிரஸ் மாவட்டத் தலைவர் செந்தில்நாதன் உள்ளிட்டோர் பங்கேற்றனர். நிகழ்ச்சி முடிவில், தேமுதிக தலைவர் விஜயகாந்த் மறைவையொட்டி, 5 நிமிடம் மவுன அஞ்சலி செலுத்தப்பட்டது.