பயணிகளுக்கு டீ போட்டுக் கொடுத்து வாக்கு சேகரித்த ராஜேந்திர பாலாஜி

விருதுநகர் நாடாளுமன்ற தொகுதி அதிமுக கூட்டணியில் உள்ள தேமுதிக கட்சி சார்பில் மறைந்த விஜயகாந்த்தின்  மகன் விஜய பிரபாகரன் முரசு சின்னத்தில் போட்டியிடுகிறார். இந்த நிலையில் விருதுநகரில் இரண்டாவது நாளாக தன்னுடைய பிரச்சாரத்தை தொடங்கிய விஜய பிரபாகரன் மற்றும் அதிமுக முன்னாள் அமைச்சர் கே.டி. இராஜேந்திர பாலாஜி ஆகியோர் வீடு வீடாக சென்று முரசு சின்னத்தில் வாக்கு சேகரித்தார்.

மேலும விருதுநகர் பேருந்து பழைய நிலையத்தில் முரசு சின்னத்திற்கு வாக்கு சேகரித்த அதிமுக முன்னாள் அமைச்சர் கே.டி. இராஜேந்திர பாலாஜி மற்றும் விஜய பிரபாகரன் இருவரும் பேருந்துக்கு உள்ளே சென்று பயணிகளிடம் முரசு சின்னத்திற்கு வாக்கு சேகரித்தார். அப்போது விருதுநகர் பேருந்து நிலையத்தில் இருந்த ஆவின் டீ கடைக்கு சென்ற அதிமுக முன்னாள் அமைச்சர் கே.டி. இராஜேந்திர பாலாஜி அங்கிருந்தவர்களுக்கு டீ போட்டுக் கொடுத்து வாக்கு சேகரித்தார். மேலும் கே.டி.இராஜேந்திர பாலாஜி தயாரித்து கொடுத்த டீயை வேட்பாளர் விஜய பிரபாகரன் ருசித்து அருந்தினார்.