லாரி கார் மோதல் - இளம்பெண் பலி

சென்னை திருமுல்லைவாயலை சேர்ந்தவர் ஜோசப் மகள் ஜெர்சி,24; இவரும், இவரது நண்பர்களுமான சென்னையை சேர்ந்த முத்துக்குமார் மகன் கமல்,21; நடராஜன் மகள் ரூபினி,34; பெருமாள் மகன் கமலேஷ்,19; ஆகிய 4 பேரும், நண்பரின் திருமண நிகழ்ச்சியில் கலந்து கொள்வதற்காக ஹூண்டாய் காரில் சென்னையில் இருந்து திருப்பூருக்கு சென்றனர். காரினை கமல் ஓட்டினார்.

இந்நிலையில், நேற்று அதிகாலை 4 மணியளவில் தியாகதுருகம் அருகே பிரிவிதிமங்கலம் புறவழிச்சாலையில் எய்ச்சர் லாரி எதிர்திசையில் வந்த கமல் ஓட்டி வந்த கார் மீது மோதி விபத்துக்குள்ளானது. இதில் படுகாயமடைந்த ஜெர்சி சம்பவ இடத்திலேயே பரிதாபமாக உயிரிழந்தார். கமல், ரூபினி, கமலேஷ் ஆகிய 3 பேருக்கும் காயம் ஏற்பட்டது.

தகவலறிந்த தியாகதுருகம் போலீசார் சம்பவ இடத்துக்கு சென்று, காயமடைந்த 3 பேரையும் மீட்டு சிகிச்சைக்காகவும், உயிரிழந்த ஜெர்சியின் உடலை பிரேத பரிசோதனைக்காகவும் கள்ளக்குறிச்சி அரசு மருத்துவமனைக்கு அனுப்பி வைத்தனர். புகாரின் பேரில், விபத்து ஏற்படுத்திய லாரி டிரைவர் மீது தியாகதுருகம் போலீசார் வழக்கு பதிந்து விசாரிக்கின்றனர்.