ஜன்னலோரத்தில் வைக்கப்படும் செல்போன்களை குறி வைத்து திருடிய இளைஞரை பொதுமக்கள் பிடித்து காவல்துறையிடம் ஒப்படைப்பு.

தேனி மாவட்டம் பெரியகுளம் அருகே உள்ள மேல்மங்கலம் கிராமத்தில் நள்ளிரவில் வீடுகளில் ஜன்னலோரத்தில் வைக்கப்பட்ட செல்போன்களை இளைஞர் ஒருவர் திருடி சென்று ஓடிய போது கிராம மக்கள் துரத்தி பிடித்து ஜெயமங்களம் காவல் துறையினரிடம் ஒப்படைத்துள்ளனர். பிடிபட்ட இளைஞர் பெரியகுளம் அழகர்சாமிபுரத்தைச் சேர்ந்த சிபிராஜ் (வயது 21) என்ற இளைஞர் என தெரியவந்தது. இதனைத் தொடர்ந்து ஜெயமங்களம் காவல்துறையினர் கைது செய்து வழக்கு பதிவு செய்துள்ளனர். மேலும் இந்த இளைஞரிடம் காவல்துறை விசாரணை மேற்கொண்டதில், வீடுகளில் ஜன்னலோரத்தில் வைக்கப்படும் செல்போன்களை குறி வைத்து திருடுவதை வழக்கமாகக் கொண்டுள்ளார் எனவும், வழிப்பறி, வீட்டை உடைத்து கொள்ளையில் ஈடுபடுவது உள்ளிட்ட ஐந்துக்கும் மேற்பட்ட குற்ற வழக்குகள் இவர் மீது நிலுவையில் உள்ளதோடு ஒரு முறை குண்டர் சட்டத்தில் சிறை சென்றுள்ளார் என்பது தெரியவந்துள்ளது.