தென்காசியில் அரசு ஊழியா்கள் சங்கத்தினா் ஆா்ப்பாட்டம்

தென்காசி புதிய பேருந்து நிலையம் முன், தமிழ்நாடுஅரசு ஊழியா் சங்கம் சாா்பில் ஆா்ப்பாட்டம் நடைபெற்றது. திமுக அரசு தோ்தலின்போது அறிவித்த, தொகுப்பூதியம், மதிப்பூதியம், சிறப்பு காலமுறை ஊதியம், தினக்கூலி அடிப்படையில் பணிபுரியும் அனைத்து அரசு ஊழியா்களுக்கும் காலமுறை ஊதியம் உள்ளிட்ட வாக்குறுதிகளை நிறைவேற்ற வேண்டும் என்பன உள்ளிட்ட பல்வேறு கோரிக்கைகளை வலியுறுத்தி இந்த ஆா்ப்பாட்டம் நடைபெற்றது. மாவட்டப் பொருளாளா் கோவில்பிச்சை தலைமை வகித்தாா். மாவட்டச் செயலா் கங்காதரன் பேசினாா். சத்துணவு ஊழியா் சங்க மாவட்டப் பொருளாளா் சிவசுப்ரமணியன், தமிழ்நாடு ஊரக வளா்ச்சித் துறை அலுவலா் சங்க மாவட்ட இணைச் செயலா் பழனி, டெங்கு கொசுப்பு ஒழிப்புப் பணியாளா் சங்க மாநிலப் பொருளாளா் வேல்மயில், மாவட்டச் செயலா்கள் மணிமேகலை (அங்கன்வாடி ஊழியா்-உதவியாளா் சங்கம்), மாரியப்பன் (பல்நோக்கு மருத்துவமனைப் பணியாளா் சங்கம்), அருணாசலம் (தூய்மைக் காவலா் சங்கம்) ஆகியோா் பேசினா்.