கோவை: ரயில் நிலையத்தில் கஞ்சா பறிமுதல் !

கோவை ரயில் நிலையத்தில், ரயில்வே பாதுகாப்புப் படையின் சிறப்புப் படையினர், போதைப் பொருள் தடுப்புப் பிரிவினருடன் இணைந்து நடத்திய சோதனையில், 62 கிலோ கஞ்சா பறிமுதல் செய்யப்பட்டது. இந்த சம்பவம் தொடர்பாக, ஒடிசா மாநிலத்தைச் சேர்ந்த 5 பெண்கள் உட்பட 6 பேர் கைது செய்யப்பட்டுள்ளனர். தன்பாத்-ஆலப்புழா எக்ஸ்பிரஸ் ரயில் (எண். 13351) சென்ற பிறகு, மேடை எண். 1A-ன் திருப்பூர் முனையில், ஆறு பேர் சந்தேகத்திற்குரிய வகையில் மூன்று வெள்ளை நிற பாலித்தீன் பைகளை எடுத்துச் செல்வதைக் கண்ட ரயில்வே காவல்துறையினர் அவர்களை விசாரித்தனர். அவர்கள் முன்னுக்குப் பின் முரணான பதில்களை அளித்ததால், காவல்துறையினர் அந்தப் பைகளைச் சோதனையிட்டனர். அதில், போதைப்பொருள் கலந்த உலர்ந்த கஞ்சா இருப்பது தெரிய வந்தது. கைது செய்யப்பட்டவர்கள், ஒடிசா மாநிலம் கந்தமால் மாவட்டத்தைச் சேர்ந்த ஜபத் திகல் (வயது 25), கண்டி திகல் (வயது 46), சுலதா நாயக் (வயது 37), ரூபினா நாயக் (வயது 44), ஜோத்ஸ்ராணி திகல் (வயது 44) மற்றும் கெலெய் நாயக் (வயது 32) ஆவார்கள். அவர்களிடமிருந்து பறிமுதல் செய்யப்பட்ட கஞ்சாவின் மதிப்பு சுமார் 31 லட்சம் ரூபாய் இருக்கும் என்று காவல்துறையினர் தெரிவித்துள்ளனர். இதுகுறித்து தொடர் விசாரணை நடைபெற்று வருகிறது.