கொலை வழக்கில் சிறையில் உள்ள குற்றவாளி மீது குண்டர் சட்டம் 

சொத்து தகராறில் ஏற்பட்ட கொலை வழக்கில், சரித்திரப் பதிவேடு குற்றவாளி மீது குண்டர் சட்டம் பாய்ந்தது.. தஞ்சாவூர் மாவட்டம், ஒரத்தநாடு உட்கோட்டம் பாப்பநாடு காவல் நிலையத்திற்குட்பட்ட ஆம்பலாப்பட்டு பகுதியில் சொத்து தகராறில் ஏற்பட்ட முன்விரோதம் காரணமாக, கடந்த 02.04.2025-ம் தேதி தீர்க்கரசன் என்பவர் பாப்பாநாட்டில் இருந்து தனது வீடான ஆம்பலாப்பட்டிற்கு வந்து கொண்டிருக்கும் போது, அவருடைய இருசக்கர வாகனத்தை வழிமறித்து சிலர் அரிவாள் உள்ளிட்ட ஆயுதங்களால் வெட்டியதில் படுகாயமடைந்த தீர்க்கரசன் தஞ்சாவூர் மருத்துவக்கல்லூரி மருத்துவமனையில் சிகிச்சை பலனின்றி 09.04.2025- ஆம் தேதி உயிரிழந்தார்.  இதுகுறித்து அவரது மனைவி ஹேமா என்பவர் கொடுத்த புகாரின் அடிப்படையில், பாப்பாநாடு காவல் நிலையத்தில் வழக்கு பதிவு செய்யப்பட்டு குற்றவாளிகளான பாப்பாநாடு சரித்திர பதிவேடு குற்றவாளியான திருக்குமார்(வயது-49), ஆம்பலாபட்டுவைச் சேர்ந்த அவரது அண்ணன் கலையரசன் (வயது-46), தஞ்சாவூர், மருத்துவக்கல்லூரி சாலையைச் சேர்ந்த சசிகுமார்(வயது-52) மற்றும் முனிஷ்குமார்(வயது-34) ஆகியோர் கைது செய்யப்பட்டு நீதிமன்ற காவலுக்கு உட்படுத்தப்பட்டு சிறையில் அடைக்கப்பட்டனர். இதில் முக்கிய சரித்திர பதிவேடு குற்றவாளியான திருக்குமார்(வயது-49) என்பவர் மீது குண்டர் தடுப்புச் சட்டத்தின் கீழ் நடவடிக்கை வேண்டி, ஒரத்தநாடு உட்கோட்ட துணைக் காவல் கண்காணிப்பாளர்  வேண்டுகோளின் படி, மாவட்ட காவல் கண்காணிப்பாளர்  இரா.இராஜாராம்  பரிந்துரையின் பேரில், தஞ்சாவூர் மாவட்ட ஆட்சியர் பிரியங்கா பங்கஜம் உத்தரவின்படி 21.05.2025-ம் தேதி குண்டர் தடுப்பு சட்டத்தின் கீழ் சிறையில் அடைத்தனர்.