கோவை: காலவரையற்ற உண்ணாவிரதம் 32-வது நாளாக தொடர்ந்தது!

கோவை மற்றும் திருப்பூர் மாவட்டங்களில் கூலி உயர்வை வலியுறுத்தி விசைத்தறி உரிமையாளர்களின் போராட்டம் தீவிரமடைந்துள்ளது. கடந்த மார்ச் 19 முதல் வேலை நிறுத்தத்தில் ஈடுபட்டு வந்த ஆயிரக்கணக்கான உரிமையாளர்கள், ஏப்ரல் 16 முதல் காலவரையற்ற உண்ணாவிரதத்தைத் தொடங்கியுள்ளனர். 2022-ம் ஆண்டு வழங்கிய கூலியில் 7% உயர்வு வழங்க ஜவுளி உற்பத்தியாளர்கள் ஒப்புக்கொண்டதை விசைத்தறி உரிமையாளர்கள் ஏற்க மறுத்துள்ளனர். கோவை திருப்பூர் மாவட்ட கூலிக்கு நெசவு செய்யும் விசைத்தறியாளர்கள் சங்கத்தின் பிரதிநிதி பூபதி கூறுகையில், மின் கட்டணம், பணியாளர் கூலி மற்றும் உற்பத்தி செலவுகளை கருத்தில் கொண்டு 30% கூலி உயர்வு வழங்க வேண்டும் என்பதே அவர்களின் கோரிக்கை. 7% உயர்வு போதுமானதாக இல்லை என்றும், நியாயமான கூலி உயர்வு கிடைக்கும் வரை உண்ணாவிரதம் தொடரும் என்றும் அவர் திட்டவட்டமாக தெரிவித்தார். இந்த போராட்டத்தால் சுமார் 2.5 லட்சம் தொழிலாளர்கள் பாதிக்கப்பட்டுள்ளனர். 15,000-க்கும் மேற்பட்ட விசைத்தறி கூடங்கள் மூடப்பட்டுள்ளதால் இதுவரை சுமார் ரூ.1000 கோடிக்கு மேல் வருவாய் இழப்பு ஏற்பட்டுள்ளதாக தெரிவிக்கப்பட்டுள்ளது. 32 நாட்களாக நேற்று நடைபெற்ற வேலை நிறுத்தத்தின் தொடர்ச்சியாக தற்போது 12 விசைத்தறி பொறுப்பாளர்கள் காலவரையற்ற உண்ணாவிரதத்தில் ஈடுபட்டுள்ளனர்.