கோவை: ரயில் நிலையத்தில் 3.5 கிலோ கஞ்சா பறிமுதல் !

கோவை ரயில் நிலையத்தில் 3.5 கிலோ கஞ்சாவை நேற்று ரயில்வே பாதுகாப்புப் படை மற்றும் போதைப்பொருள் நுண்ணறிவுப் பிரிவு போலீசார் பறிமுதல் செய்தனர். இந்த சம்பவத்தில் ஒடிசாவைச் சேர்ந்த 41 வயது நபர் கைது செய்யப்பட்டார். கோர்பா-திருவனந்தபுரம் எக்ஸ்பிரஸ் ரயில் கோவை ரயில் நிலையத்தை வந்தடைந்தபோது, ரயில்வே பாதுகாப்புப் படை உதவி ஆய்வாளர் கே.தேவராஜன், தலைமை காவலர்கள் மற்றும் போதைப்பொருள் நுண்ணறிவுப் பிரிவு தலைமை காவலர்கள் ராஜு, டி.குலந்தைவேல் ஆகியோர் இணைந்து சிறப்பு சோதனையில் ஈடுபட்டனர். அப்போது சந்தேகத்திற்கிடமான வகையில் வெள்ளை நிற பாலித்தீன் பையுடன் வந்த ஒருவரை பிடித்து சோதனை செய்ததில், சுமார் 3.5 கிலோ கஞ்சா இருப்பது கண்டுபிடிக்கப்பட்டது. கைது செய்யப்பட்ட நபர் ஒடிசாவைச் சேர்ந்த சத்யநாராயண் நாயக் (வயது 41) என்பது தெரியவந்தது. பறிமுதல் செய்யப்பட்ட கஞ்சாவின் மதிப்பு சுமார் ரூ. 1,75,000 இருக்கும் என்று தெரியவருகிறது.போதைப்பொருள் நுண்ணறிவுப் பிரிவு உதவி ஆய்வாளர் இளவழுதி, அவரைக் கைது செய்தார். பின்னர் அவர் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டார். இந்த சம்பவம் கோவை ரயில் நிலையத்தில் பெரும் பரபரப்பை ஏற்படுத்தியது.