ஸ்கூட்டரில் இருந்த ரூ.75 ஆயிரம் பணத்தை திருடிய நபரை போலீசார் தேடி வருகின்றனர். உளுந்துார்பேட்டை, பிரகாஷ் நகரைச் சேர்ந்தவர் ஜெயக்குமார்,56; உளுந்துார்பேட்டை அரசு போக்குவரத்து பணிமனையில் பணிபுரிந்து வருகிறார். இவர், நேற்று வங்கியில் ரூ.75 ஆயிரம் பணம் கட்டுவதற்காக தனது ஸ்கூட்டர் சீட்டின் அடியில் வைத்துச் சென்றார். மதியம் 2:00 மணிக்கு சென்னை சாலையில் உள்ள ஓட்டல் முன் ஸ்கூட்டரை நிறுத்தி விட்டு சாப்பிட சென்றார். சற்று நேரம் கழித்து வந்து பார்த்தபோது, ஸ்கூட்டரில் வைத்திருந்த பணம் திருடு போயிருந்தது. இதுகுறித்து ஜெயக்குமார் கொடுத்த புகாரின் பேரில் உளுந்துார்பேட்டை போலீசார் விசாரித்து வருகின்றனர்.