கட்டுமானப் பொருட்கள் திருடிய 3 பேர் கைது

திருப்பூர், திருமுருகன்பூண்டியை அடுத்த ராக்கியாபாளையம் பகுதியைச் சேர்ந்தவர் ஆரோக்கியதாஸ் (55). இவர் ராக்கியாபாளையம் ஜெகநாதன்நகரில் உள்ள ஒரு வீட்டில் கட்டுமான பணிகளை மேற்கொண்டு வந்தார். இந்த நிலையில் அங்கு வைக்கப்பட்டிருந்த சில கட்டுமானப் பொருட்கள் தொடர்ந்து திருட்டு போனது. இதுகுறித்து ஆரோக்கியதாஸ் திருமுருகன்பூண்டி போலீஸ் நிலையத்தில் புகார் கொடுத்தார். இதன் பேரில் போலீசார் வழக்குப்பதிவு செய்து சம்பந்தப்பட்ட வீட்டை கண்காணித்து வந்தனர். அப்போது கட்டுமானப் பொருட்கள் திருட்டில் ஈடுபட்டது அதே பகுதியைச் சேர்ந்த ஜீவானந்தம் (21), சுதர்சன் (19) என்பது தெரிய வந்தது.

மேலும் அவர்கள் இருவரும் கட்டுமானப் பொருட்களை திருடி மங்கலம்-அவினாசி சாலையில் உள்ள ராம்மோகன் (36) என்பவருக்கு சொந்தமான பழைய இரும்பு கடையில் விற்பனை செய்ததும் போலீஸ் விசாரணையில் தெரிய வந்தது. இதையடுத்து போலீசார் ஜீவானந்தம், சுதர்சன் மற்றும் கடை உரிமையாளர் ராம்மோகன் உள்ளிட்ட 3 பேரை கைது செய்தனர். மேலும் அவர்களிடம் இருந்து மோட்டார்சைக்கிள் மற்றும் ரூ.10 ஆயிரம் பணத்தையும் போலீசார் பறிமுதல் செய்தனர்.