அரசு பேருந்து - கார் நேருக்கு நேர் மோதல், 4 பேர் காயம்

திருவள்ளூர் மாவட்டம், திருத்தணி பகுதியை சேர்ந்த குமார், சரவணன், திருமால், பரமு ஆகிய நான்கு பேரும் திருவாலங்காடு வழியாக திருவள்ளூர் நோக்கி காரில் சென்று கொண்டிருந்தனர். அப்போது திருவள்ளூரில் இருந்து திருவாலங்காடு நோக்கி வந்து கொண்டிருந்த அரசு பேருந்து நாகாத்தாங்கல் என்ற இடத்தில் வந்த போது எதிரே வந்த கார் வளைவில் திரும்பும்போது நேருக்கு நேர் மோதியது. இதில் கார் நொறுங்கியதில் காரில் பயணித்த நான்கு பேரும் பலத்த காயமடைந்தனர். இதுகுறித்து தகவல் அறிந்து சம்பவ இடத்திற்கு வந்த திருவாலங்காடு போலீசார் காரில் சிக்கியவர்களை மீட்க முடியாமல் சிரமப்பட்டனர். இதனை அடுத்து கடப்பாறை மூலம் காரை லேசாக பெயர்த்து காரில் சிக்கியவர்களை மீட்டனர். இதனை அடுத்து பலத்த காயம் அடைந்து மீட்கப்பட்ட நான்கு பேரையும் திருவள்ளூர் மாவட்ட அரசு மருத்துவக் கல்லூரி மருத்துவமனைக்கு சிகிச்சைக்காக அனுப்பி வைத்தனர். இதில் குமார் ஆபத்தான நிலையில் இருப்பதால் அவருக்கு தீவிர சிகிச்சை அளிக்கப்பட்டு வருகிறது. காரும் அரசுப் பேருந்தும் நேருக்கு நேர் மோதிய விபத்தில் நான்கு பேர் படுகாயம் அடைந்த சம்பவம் அப்பகுதியில் பெரும் பரபரப்பை ஏற்படுத்தியது.