50 ஆயிரத்துக்கும் மேற்பட்டவர்கள் இறங்கிய தீமிதி திருவிழா

நாமக்கல் மாவட்டம் திருச்செங்கோட்டில் உள்ள புகழ்பெற்ற சின்ன ஓங்காளியம்மன் கோவில் மாசிக் குண்டம் திருவிழா கடந்த மாதம் 28ம்தேதி பூச்சாட்டுதலுடன் தொடங்கியது. குண்டம் இறங்க பல ஆயிரக்கணக்கான பக்தர்கள் காப்புக் கட்டி இருந்தனர். பூச்சாட்டுதலை தொடர்ந்து அம்மன் அழைத்தல், சக்தி கரகம் எடுத்தல், அக்னி கரகம், அலகு குத்துதல், குத்துவிளக்கு பூஜை, 108 சங்காபிஷேகம், பூச்சொரிதல் விழா என பல்வேறு நிகழ்ச்சிகள் நடைபெற்றது. மாசிகுண்டம் பெருவிழாவின் முக்கிய நிகழ்வான குண்டம் இறங்க காப்பு கட்டிய பக்தர்கள் இன்று அதிகாலை 60 அடி நீளமுள்ள குண்டத்தில் இறங்கினார்கள். முதலில் கோவில் பூசாரி கும்பத்துடன் குண்டத்தில் இறங்கினர்.இரவு சுமார் எட்டு முப்பது மணிக்கு குண்டம் பற்ற வைக்கப்பட்டு குண்டம் பரப்புதல் நிகழ்ச்சி நடந்து அதி காலை நாலு முப்பது மணிக்குமுதலில் பூசாரி கும்பத்துடன் குண்டத்தில் இறங்கியதை தொடர்ந்து குழந்தைகள் , பெண்கள், முதியவர் என பலரும் பூக்குழியில் இறங்கினார்கள். தீராத நோயை தீர்க்க வேண்டுதல் செய்தும், நோய் தீர்ந்தவர்கள், குழந்தை பாக்கியம் இல்லாமல் வேண்டுதல் செய்து அம்மன் அருளால் குழந்தை பேறு பெற்றவர்கள் என பலதரப்பினரும் தீ மித்து தங்கள் வேண்டுதலை நிறைவேற்றினார்கள். இது போல் குறைகள் உள்ளவர்கள் தங்கள் குறைகளை தீர்க்க அம்மனிடம் வேண்டுதல் செய்தும் தீ மிதித்தனர். தொடர்ந்து பெண்கள் ஓங்காளியம்மனுக்கு பொங்கல் வைத்து வழிபட்டனர் அம்மன் சிறப்பு அலங்காரத்தில் பக்தர்களுக்கு காட்சி அளித்தார் இந்த குண்டம் திருவிழாவில் திருச்செங்கோடு மற்றும் சுற்றுவட்டார மக்கள் மட்டுமல்லாமல் சேலம், கரூர், நாமக்கல்,ஈரோடு, குமாரபாளையம், பரமத்தி வேலூர், என பல்வேறு பகுதிகளில் இருந்து சுமார் 40 ஆயிரத்துக்கும் மேற்பட்ட பக்தர்கள் தீ மிதித்து தங்கள் நேர்த்திக் கடனை செலுத்தினார்கள். வரும் மார்ச் 15ம் தேதி அம்மன் திருவீதி உலாவுடன் மாசிக்குண்டம் நிகழ்ச்சி நிறைவடைகிறது. திருவிழாவையொட்டி திருச்செங்கோடு காவல்துறை கண்காணிப்பாளர் கிருஷ்ணன் தலைமையில் பாதுகாப்பு பணியில் ஏராளமான போலீசார் ஈடுபட்டிருந்தனர் இன்னும் ஆயிரக்கணக்கான பக்தர்கள் நீண்ட வரிசையில் காத்து இருப்பதால் குண்டம் இறங்கும் நிகழ்ச்சி மதியம் 12 மணி வரை தொடரும் என எதிர்பார்க்கப்படுகிறது.