முதியவர் மீது தாக்குதல் நடத்தியவர்கள் மீது வழக்குபதிவு

திருச்சி மாவட்டம், லால்குடி அருகே அன்பில் மாரியம்மன் கோயில் தெருவை சேர்ந்தவர் 60 வயதான பிரிதிவிராஜ்.இவருடைய மகள் 27 வயதான பிரியா. அதே பகுதியைச் சேர்ந்தவர் 58 வயதான மனோகர். இவரது மகன் 27 வயதான ராஜ்குமார். இவர்கள் இருவருக்கும் இடையே வீட்டு தகராறு தொடர்பாக முன் விரோதம் இருந்து வந்துள்ளது.இந்நிலையில் பிரிதிவிராஜை வீட்டை காலி செய்யுமாறு மனோகர் கூறியதாக கூறப்படுகிறது.

இதில் இருவருக்கும் வாய் தகராறு ஏற்பட்டு கைகலப்பாக மாறி உள்ளது. இந்த தகராறில் மனோகர் மற்றும் அவரது மகன் ராஜ்குமார் ஆகியோர் பிரிதிவிராஜ் மற்றும் அவரது மகள் பிரியாவை தாக்கியதாக கூறப்படுகிறது. இதில் காயமடைந்த இருவரும் லால்குடி அரசு மருத்துவமனையில் அனுமதிக்கப்பட்டு சிகிச்சை பெற்று வருகின்றனர். இதுகுறித்து லால்குடி காவல் நிலையத்தில் பிரியா கொடுத்த புகாரின் பேரில் லால்குடி போலீசார் தந்தை மகன் மீது வழக்கு பதிவு செய்து தந்தை மனோகரை கைது செய்தனர்.