கிணற்றில் சடலமாக மிகுந்த ஐடிஐ மாணவன்

திருச்சி மாவட்டம், மணப்பாறையை அடுத்த சீகம்பட்டியைச் சேர்ந்தவர் அடைக்கன். இவரது மகன் தரணீஷ்வரன், மணப்பாறை அருகே மஞ்சம்பட்டியில் உள்ள ஒரு தனியார் தொழிற்பயிற்சி நிலையத்தில் மோட்டார் மெக்கானிக் இரண்டாம் ஆண்டு படித்து வருகிறார். இந்நிலையில் கடந்த 11 ம் தேதி தொழிற்பயிற்சி நிலையத்திற்கு சென்ற மாணவர் மீண்டும் வீடு திரும்பவில்லை என கூறப்படுகிறது. இதனைத் தொடர்ந்து குடும்பத்தினர் இவரை காணமல் போனது குறித்து மணப்பாறை போலீஸ் நிலையத்தில் புகார் அளித்தனர். புகாரின் பேரில் போலீசார் வழக்கு பதிவு செய்து விசாரணை நடத்தினர். விசாரணையில் கடந்த 11 ம் தேதி மதியம் மாணவன் பயிற்சி நிலையத்தில் இருந்து வெளியில் சென்றது தெரியவந்தது. இந்நிலையில் இன்று காலை சீகம்பட்டியில் உள்ள மாயாண்டி என்பவரது விவசாய தோட்டத்தில் வாலிபர் ஒருவர் பிணமாக மிதப்பதாக கிடைத்த தகவலின் பேரில் போலீசார் சம்பவ இடத்திற்கு சென்று விசாரணை நடத்தினர்.

மேலும், வாலிபர் இறந்த சம்பவம் பற்றி தகவல் அறிந்த அந்த பகுதி மக்களும் அந்த பகுதியில் திரண்டு வந்து பார்த்த போது இறந்து கிடந்தது மாயமான மாணவன் தரணீஷ்வரன் என்பது தெரியவந்தது. இதையடுத்து அவரின் உடலை போலீசார் கைப்பற்றி பிரேத பரிசோதனைக்காக மணப்பாறை அரசு மருத்துவமனைக்கு அனுப்பி வைத்து வழக்கு பதிவு செய்து விசாரணை நடத்தி வருகின்றனர். மாயமான மாணவன் கிணற்றில் ஐடிஐ சீருடையுடன் முகத்தில் காயங்களுடன் பிணமாக மிதந்த சம்பவம் அந்த பகுதியில் அதிர்ச்சி ஏற்படுத்தியுள்ளது . மேலும் மாணவன் கொலை செய்யப்பட்டாரா அல்லது தற்கொலையா செய்து கொண்டாரா என்பது குறித்தும் இறப்பிற்கான காரணங்கள் குறித்து போலீசார் தொடர்ந்து விசாரணை நடத்தி வருகின்றனர். .