நகராட்சி பெண் சுகாதாரப் பணியாளர்களுக்கு பாராட்டு!

புதுக்கோட்டை சமூக ஆர்வலர்கள், இந்திய ரெட்கிராஸ் சங்கம், ரோட்டரி சங்கங்கள், ஜேசிஐ அமைப்புகள் உள்ளிட்ட அமைப்புகள் இணைந்து நடத்திய உலக மகளிர் தின விழாவில் 230 பெண் சுகாதாரப் பணியாளர்களுக்கு பாராட்டுத் தெரிவித்து நினைவுப் பரிசுகள் வழங்கப்பட்டன. நிகழ்ச்சிக்கு டாக்டர் எஸ். ராம்தாஸ் தலைமை வகித்தார். புதுக்கோட்டை நகர்மன்றத் தலைவர் செ. திலகவதி, துணைத் தலைவர் மு. லியாகத்அலி ஆகியோர் நினைவுப் பரிசுகளை வழங்கினர். இதே நிகழ்ச்சியில் மின் மயானத்தில் பணியாற்றும் பெண்களும், 18 ஆண்டுகளுக்கும் மேலாக பூ விற்கும் பெண் ஆகியோரும் சிறப்பிக்கப்பட்டனர். நிகழ்ச்சியில் கழகத் தலைவர் ராமையா, இளங்கோவடிகள் இலக்கிய மன்ற பொருளாளர் சத்தியராம் ராமுக்கண்ணு, ரோட்டரி முன்னாள் ஆளுநர் அ.லெ. சொக்கலிங்கம், ரெட்கிராஸ் செயலர் ராஜா முகமது, மரம் நண்பர்கள் அமைப்பின் செயலர் கண்ணன் உள்ளிட்டோரும் பங்கேற்றனர். அனைத்துப் பெண்களுக்கும் மதியவிருந்து வழங்கப்பட்டது. ஏற்பாடுகளை மரம் நண்பர்கள் அமைப்பின் ஒருங்கிணைப்பாளர் பேரா. சா. விஸ்வநாதன் உள்ளிட்டோர் செய்தனர்.