அடையாளம் தெரியாத வாகனம் மோதி தச்சு தொழிலாளி பலி

ஈரோடு மாவட்டம், பவானி அருகே மேட்டுநாசுவம்பாளையம் பகுதியில் வசிப்பவர் சண்முகம், 43. தச்சு தொழிலாளி. இவர் குமாரபாளையம் கே.ஓ.என் .தியேட்டர் அருகே தச்சு பட்டறை வைத்து தொழில் செய்து வருகிறார். இவரது மனைவி பாரதி, 36. தனியார் நிறுவன கூலி. சண்முகம் நேற்று முன்தினம் காலை 07:00 மணியளவில் வேலைக்கு சென்று விட்டார். இரவு 09:00 மணியளவில் மனைவி பாரதி, போன் செய்து கேட்ட போது, வந்து விடுகிறேன் என்று சண்முகம் கூறியுள்ளார். மீண்டும் இரவு 11:00 மணியளவில் கேட்ட போது, சண்முகம் போன் எடுக்கவில்லை. நேற்று காலை போன் செய்த போது, சண்முகம் போன் சுவிட்ச் ஆப் ஆகியிருந்தது. கணவரின் நண்பர் செந்தில் என்பவர், நேற்று காலை 07:00 மணியளவில், உங்கள் கணவர், குமாரபாளையம் சேலம் கோவை புறவழிச்சாலை, எஸ்.எஸ்.எம் பள்ளி அருகே சர்வீஸ் சாலையில் அடையாளம் தெரியாத வாகனம் மோதி இறந்து கிடக்கிறார் என்று சொல்ல, நேரில் வந்த பாரதி, சடலத்தை மீட்டு, ஆம்புலன்ஸ் மூலம் குமாரபாளையம் ஜி.ஹெச்.கொண்டு வந்தார்.  விபத்துக்கு காரணமான வாகனம் மீது நடவடிக்கை எடுக்க வேண்டி குமாரபாளையம் போலீசில் பாரதி புகார் கொடுத்தார். புகாரின்படி குமாரபாளையம் போலீசார், விபத்துக்கு காரணமான வாகனத்தை தேடி வருகின்றனர்.