சைக்கிள் மீது கார் மோதிய விபத்தில் முதியவர் உயிரிழப்பு

திருச்சி மாவட்டம் முசிறி அருகே சுக்காம்பட்டி மேலக்குடி தெருவை சேர்ந்தவர் 73 வயதான தங்கராசு. இவர் தனது சைக்கிளில் புலிவலம் முசிறி சாலையில் சென்று கொண்டிருந்தார். அதேபோல் மண்ணச்சநல்லூர் அருகே அய்யம்பாளையம் நெடுங்குளம் மேற்கு பகுதியைச் சேர்ந்த 45 வயதான வெங்கடேஷ் எதிரே காரில் வந்து கொண்டிருந்தார். இந்நிலையில் தண்டலை முடுக்கு சாலை பகுதியில் சென்று கொண்டிருந்த போது தங்கராசு சென்ற சைக்கிள் மீது எதிரே வந்த கார் மோதி விபத்துக்குள்ளானது. இதில் தடுமாறி கீழே விழுந்த தங்கராசு படுகாயம் அடைந்தார். விபத்தைக் கண்ட அக்கம் பக்கத்தினர் தங்கராசுவை மீட்டு சிகிச்சைக்காக முசிறி அரசு மருத்துவமனைக்கு அனுப்பி வைத்தனர். அங்கு முதலுதவி சிகிச்சை அளிக்கப்பட்டு பின்னர் மேல் சிகிச்சைக்காக சமயபுரம் அருகே இருங்களூர் பகுதியில் உள்ள தனியார் மருத்துவக் கல்லூரி மருத்துவ மனைக்கு அனுப்பி வைத்தனர்.அங்கு சிகிச்சை பெற்று வந்த நிலையில் சிகிச்சை பலனின்றி பரிதாபமாக உயிரிழந்தார். இந்த விபத்து குறித்து முசிறி போலீசார் வழக்கு பதிவு செய்து விசாரணை செய்து வருகின்றனர்.